Լիբանանյան «Հեզբոլլահ» շարժումը, ամենայն հավանականությամբ, կարող է հարվածել Իսրայելին՝ անկախ այն բանից, թե Իրանը ինչ մտադրություն ունի. այս մասին CNN-ին հայտնել են հետախուզական տվյալներին ծանոթ երկու աղբյուրներ:
Նրանցից մեկն ասել է, որ «Հեզբոլլահ»-ը պլանավորման հարցում ավելի արագ է շարժվում, քան Իրանը և պատրաստվում է հարվածել Իսրայելին առաջիկա օրերին: Մինչդեռ Իրանը կարծես թե դեռ մշակում է Իսրայելին իր պատասխանը, լրատվամիջոցին ասել են բազմաթիվ պաշտոնյաներ:
Ամերիկացի զինվորականներից մեկը CNN-ին պատմել է, որ Իրանը կատարել է որոշ, բայց ոչ բոլոր նախապատրաստությունները, որոնք ԱՄՆ-ն ակնկալում է տեսնել Իսրայելի վրա խոշոր հարձակման նախաշեմին:
Անհասկանալի է, թե Իրանը և «Հեզբոլլահ»-ը ինչպե՞ս կամ արդյոք համակարգո՞ւմ են հնարավոր հարձակումը, ասել է քաջատեղյակ աղբյուրը՝ չբացառելով, որ հավանական հարվածի հարցում այս երկուսը կարող են նաև համակարծիք չլինել:
Նշենք, որ Իսրայելը պատրաստվում է Իրանի և լիբանանյան «Հեզբոլլահ» շարժման կողմից առաջիկա օրերին հնարավոր հարձակումներին և ենթադրում է, որ հարձակումները կարող են լինել մի քանի ճակատներից:
Իրանը, նրա լիբանանյան դաշնակից «Հեզբոլլահ»-ը և պաղեստինյան ՀԱՄԱՍ-ն Իսրայելին մեղադրում են չորեքշաբթի Թեհրանում ՀԱՄԱՍ-ի առաջնորդ Իսմայիլ Հանիեի սպանության համար: Նրա սպանությունը տեղի է ունեցել մի քանի ժամ անց այն բանից հետո, երբ Բեյրութում Իսրայելի հասցրած հարվածից սպանվել էր «Հեզբոլլահ»-ի ռազմական ղեկավար Ֆուադ Շուքրին: Իսրայելը ստանձնել է Շուքրի սպանության պատասխանատվությունը, սակայն պաշտոնապես չի մեկնաբանել Հանիեի սպանությունը: Թե՛ Իրանը, թե՛ «Հեզբոլլահ»-ը խոստացել են վրեժխնդիր լինել սպանությունների համար:
Այս համատեքստում Իսրայելի անվտանգության կառույցները գտնվում են «ամենաբարձր զգոնության» վիճակում, իսկ ԱՄՆ-ի գլխավորած միջազգային կոալիցիայի անդամները, ներառյալ Մեծ Բրիտանիան և արաբական դաշնակից երկրները, որոնք նպատակ ունեն խափանել Իրանի հնարավոր հարձակումները, փորձում են զսպել և կասեցնել դրանք:
