Դատարանը կրկին մերժեց Ռոման Երիցյանի եղբորը, Արամ Երիցյանին կալանավորելու միջնորդությունը, որը քննչականն այս անգամ ներկայացրել էր իրավունքի և բարոյականության սկզբունքների արհամարհմամբ։
Այս մասին հայտնում է փաստաբան Արսեն Բաբայանը։
«Նորից ուրախությամբ արձանագրում եմ, որ գրանցվեց Արամի հաղթանակը։
Այս երկրորդ միջնորդության ներկայացնելն արձանագրեց, որ քննչական կոմիտեն հրաժարվել է իր առաքելությունից ու ստանձնել է հակամարդկային արարքի պաշտպանությունը:
Ռոմանի հրապարակած տեսանյութում, որտեղ պարեկները ուղիղ խոշտանգման են ենթարկում Արամ Երիցյանին, հստակորեն հաստատվում է, որ առնվազն այդ երկու պարեկները տառապում են հակամարդկային հիվանդությամբ: Նրանք, իմ գնահառմամբ, մարդատյաց են»,- գրել է նա։
Հիշեցնենք՝ օգոստոսի 1-ին պարեկների գործադրած բռնությունից Արամ Երիցյանը մարմնական վնասվածքներ էր ստացել։ ՆԳՆ-ն ու ՔԿ-ն էլ հայտարարել էին, թե ոչ թե Երիցյանն է ծեծի ենթարկվել, այլ՝ պարեկները՝ նրա կողմից։ Երիցյանի դեմ նախաձեռնվել էր քրեական վարույթ։
Օգոստոսի 4-ին դատարանը ոչ միայն մերժել էր Արամ Երիցյանին կալանավորելու միջնորդությունը, այլև ոչ իրավաչափ էր ճանաչել նրա եռօրյա ձերբակալությունը։ Օգոստոսի 7-ին Արամ Երիցյանին կրկին կալանավորելու միջնորդություն էր ներկայացվել, որը նույնպես դատարանը մերժեց։
