Նոր Զելանդիայի բնակչուհին դատապարտվել է երկու ամսվա ազատազրկման՝ իր շանը՝ Նուգիին, չափից շատ կերակրելու համար: Դա հանգեցրել էր մի իրավիճակի, երբ ընտանի կենդանին հազիվ էր կարողանում 10 մետր քայլել առանց հանգստանալու, գրում է odditycentral.com-ը։
Շունը կշռում էր 53,7 կգ, իսկ նրա փոքր ոտքերը հազիվ էին կարողանում պահել հսկայական մարմինը: Նրա մաշկի տակ այնքան ճարպ է եղել, որ բժիշկները հազիվ են կարողացել լսել սրտի զարկեր։ Նուգին նաև տառապում էր կոնյուկտիվիտից և որովայնի վերքեր ուներ, ամենայն հավանականությամբ, այն պատճառով, որ նա ժամանակի մեծ մասն անցկացնում էր պառկած, քանի որ չէր կարողանում շարժվել:
Շան տերը կենդանուն կերակրում էր՝ օրական տալով ութից տասը կտոր հավի միս, շատ թխվածքաբլիթներ՝ կարծես անտեղյակ լինելով այն փաստից, որ դա սպանում է կենդանուն:
Նշվում է, որ ի վերջո շունն ավելորդ քաշի հետ կապված բարդությունների հետևանքով սատկել է: Նրա տիրոջ դեմ դատական հայց է ներկայացվել՝ կենդանուն չափից ավելի կերակրելու և, ի վերջո, նրա մահվան պատճառ դառնալու համար: Անցյալ շաբաթ Մանուկաուի շրջանային դատարանը նրան պարտավորեցրել է վճարել 720 դոլարի փոխհատուցում, ինչպես նաև արգելել է մեկ տարի շուն պահել և դատապարտել նրան երկու ամսով բանտարկման:
