Էլեկտրոնիկա արտադրող Samsung հարավկորեական ընկերության աշխատակիցների արհմիությունը հայտարարել է անժամկետ գործադուլ: Ի սկզբանե գործադուլը եռօրյա էր և պետք է ավարտվեր հուլիսի 10-ին, սակայն այն այժմ անժամկետ է դարձել։
Այսպիսով, արհմիությունը ցանկանում է բանակցությունների հասնել ընկերության ղեկավարության հետ։
«Մենք ղեկավարության հետ չենք խոսել երկուշաբթի գործադուլի մեկնարկից ի վեր», - Reuters-ին ասել է արհմիության փոխնախագահ Լի Հյուն Կուկը:
Նրա խոսքով՝ հուլիսի 8-ին հայտարարված գործադուլի արդյունքում Samsung-ի որոշ հոսքագծերում չիպերի արտադրությունը խաթարվել է։ Միևնույն ժամանակ, Samsung-ը պնդել է, որ աշխատողների՝ իրենց պարտականությունները կատարելուց հրաժարվելը չի հանգեցրել արտադրական գործընթացի ձախողման:
Արհմիության տվյալներով՝ գործադուլին միացել է 6,5 հազար մարդ։ Հաշվի առնելով վերանայված պահանջները՝ արհմիությունը պահանջում է 3,5 տոկոսով բարձրացնել աշխատավարձերը, հավելավճարները և հատկացնել լրացուցիչ հանգստյան օրեր։
