Նոր Կալեդոնիայում սկսված անկարգությունները Ֆրանսիայի նախագահին ստիպել են փոփոխություններ կատարել աշխատանքային գրաֆիկում։ Էմանուել Մակրոնը Նորմանդիա նախատեսվող ուղևորության փոխարեն կայցելի Ֆրանսիայի անդրծովյան տարածք, գրում է euronews.com-ը։
Ֆրանսիայի անվտանգության ուժերը աստիճանաբար վերահսկողության տակ են առնում իրավիճակը Նոր Կալեդոնիայում։ Դրա մասին է վկայում նաև Էմանուել Մակրոնի՝ Խաղաղօվկիանոսյան տարածք այցելելու մտադրությունը։ Ֆրանսիայի կառավարության խոսնակ Պրիսկա Թեվենոն ընդգծել է, որ «կարգուկանոնի վերականգնումն անհրաժեշտ պայման է ցանկացած երկխոսության մեկնարկի համար»՝ նշելով, որ «գործադիր իշխանությունը շարունակում է քաղաքական լուծման որոնումները»։
Հայտնի է դարձել նաև, որ վարչապետ Գաբրիել Աթալը նույնպես կայցելի Նոր Կալեդոնիա, բայց ոչ շտապ, այլ «առաջիկա շաբաթներին»։
Ավելի քան մեկ շաբաթ արշիպելագում շարունակվող բախումների, հրկիզումների ու թալանի պատճառով անցած չորեքշաբթի արտակարգ դրություն է հայտարարվել։ Փարիզը կարգադրել է այնտեղ 1000 հոգանոց անվտանգության ուժեր տեղակայել։
Անկարգությունների պատճառն ընտրական նոր օրենքն է, որը պետք է ընդունվի, ինչպես նշել է ինքը՝ Մակրոնը, մինչև հունիսի վերջ։ Ըստ օրենքի՝ քվեարկելու հնարավորություն կունենան բոլոր նրանք, ովքեր ավելի քան 10 տարի ապրել են Նոր Կալեդոնիայում։ Սա զայրացրել է Նոր Կալեդոնիայի անկախության կողմնակիցներին, հատկապես բնիկներին: Բողոքի ցույցերն արագ վերաճել են խոշոր բախումների, վեց մարդ զոհվել է: Կան հարյուրավոր վիրավորներ։ Անկարգությունների վնասը դեռ հստակեցված չէ, բայց արդեն պարզ է, որ դրանք մեծ են՝ վնասվել և թալանվել է ավելի քան 400 առևտրային գրասենյակ, սուպերմարկետ և խանութ։
Փարիզը Բաքվին, ինչպես նաև Մոսկվային և Պեկինին մեղադրել է Նոր Կալեդոնիայի ներքին գործերին միջամտելու և անջատողականներին աջակցելու համար։ Օրինակ՝ համացանցում շրջանառվում են ցուցարարների լուսանկարներն ու տեսանյութերը՝ ձեռքներին ադրբեջանական դրոշներով, Ադրբեջանի նախագահ Իլհամ Ալիևի դիմանկարներով։ Բաքուն հերքում է մեղադրանքները։
