Տնկիների տեղադրումը պլանավորում ենք սկսել ապրիլի վերջ, մայիսի սկիզբ: Այժմ գտնվում ենք գնումների հայտարարման փուլում, մոտավորապես 20-30 հազար վայրագ տեսակի և շուրջ 10 հազար արդեն պատվաստված տեսակի փոքր տնիկիներ ենք նախատեսում տեղադրել:
Այս մասին այսօր Երևանի քաղաքապետարանի գործակարգավարական նիստի ժամանակ ասել է «Կանաչապատում և շրջակա միջավայրի պահպանություն» ՀՈԱԿ-ի տնօրեն Արմեն Բեգոյանը՝ պատասխանելով քաղաքապետ Տիգրան Ավինյանի հարցերին:
Հարցին, թե ինչ տեսակի ծառատեսակներ են ստանալու վերջում, Բեգոյանը պատասխանեց.
«Մենք նախատեսում ենք ջերմոցատնկարանային տնտեսությունում աճեցնել գիտատեխնիկական խորհրդի և գիտական աշխատաժողովի կողմից Երևան քաղաքում ընտրված ծառատեսակների հիմնական մասը, դրանք են՝ կաղնիներ, սոսիներ, թխկիներ: 7-ն էին, այժմ չեմ հիշում մնացած անունները:
Մենք նախատեսում են ջերմոցում ունենալ այնպիսի հզորություն, որ տարեկան կարողանանք արտադրել 5000 ծառ, խոսքը վերաբերվում է արդեն պատրաստի ծառերին»,- ասել է նա:
Տիգրան Ավինյանը հետաքրքրվեց, թե մոտավորապես միջինում քանի տարի է տևելու տնկիները աճեցնելու պրոցեսը և երևանում երբ կկարողանանք տեղադրվել ծառերը: Այսինքն տնկարանում քանի տարի են մնալու տնկիները:
«Շատ փոքր տնկիները որոնք պետք է դեռ պատվաստվեն, դրանք տեղափոխելու համար անհրաժեշտ կլինի մոտավորապես 2 տարի, իսկ քաղաքային տնկարկները մոտավորապես 5 տարի»,- ասել է Բեգոյանը: