ZTB NEWS Ақтауда көз жұмған Алина есімді қыздың өліміне қатысты жаңа мәліметтерді анықтады, - деп хабарлайды Tengrinews.kz тілшісі.
Былтыр мамырда қыз өз-өзіне қол жұмсаған. Қайғылы жағдайға дейін бірнеше күн бұрын ол ауыр қылмыстың құрбаны болған. Мефедронның әсерімен бейтаныс ер адамдар оған шабуыл жасап, ұрлап әкетіп, соққыға жыққан, кейін зорлап, екі миллион теңгеге несие рәсімдеуге мәжбүрлеген.
Алинаның әпкесі басылымға эксклюзив сұхбат беріп, оқиғаның мән-жайын және сот шешімі неліктен әділетсіз болғанын айтты.
Алина спортшы болған, фитнес жаттықтырушысы болып жұмыс істеген. Ол өз жұмысын жақсы көріп, спорттық шаралар мен марафондарға жиі қатысқан.
"14 мамырда ол жұмыстан кейін үйге жалғыз қайтып келе жатқан. Сол уақытта бейтаныс бес ер адам оны байқап, шабуыл жасап, күшпен көлікке отырғызған. Тергеу кезінде қылмыскерлер оның қыз екенін білмегенін, жігіт деп ойлағанын айтып ақталды", – деді марқұмның әпкесі.
Олар қызды түн бойы азаптап, қорқытқан, зорлық-зомбылық көрсеткен, жанармай бекетінде күшпен ұстап отырған. Қылмыскерлердің барлығы мефедрон қолданған. Кейін олар Алинаны да есірткі қабылдауға мәжбүрлеп, зорлаған.
Күдіктілердің бірі - 1991 жылы туған ер адам, үйленген, бала тәрбиелеп отыр. Тергеу кезінде ол алғаш рет мефедрон қолданып көргенін айтып, ештеңе есінде жоқ екенін алға тартқан. Ол кінәсін мойындамаған. Қалған төртеуі қылмыстың барлық егжей-тегжейін айтып берген.
Таң атқан соң қылмыскерлер қызды өзінің телефонынан екі миллион теңгеге несие рәсімдеуге мәжбүрлеген. Кейін бұл ақшаны базардағы таныстары арқылы шешіп алған.
Содан соң қызды қалаға әкеліп, біреуге айтса, өлтіретінін айтып қорқытқан.
"Өзіне қол жұмсамастан бұрын Алина бәрін құрбысына айтып берген. Құрбысы оны ағасына айтуға көндіреді. Алина қылмыскерлерді жазалау үшін соңына дейін баратынын айтқан. Ағасы бұл туралы анасына айтуды сұраған, бірақ Алина ұялған", – деді марқұмның әпкесі.
Бұл сұмдыққа көне алмаған қыз құрбысының көз алдында терезеден секіріп кеткен.
"Алина өз жұмысын жақсы көретін, саяхаттауды армандайтын. Бос уақытында кітап оқып, фильмдер көретін. Оның марафондардан алған медальдары көп", – деді әпкесі.
Іс сотқа жеткен, бірақ марқұмның туыстары қылмыскерлерге қатаң жаза тағайындауды талап етіп отыр.
"Біз басты қылмыскердің өмір бойына бас бостандығын айыруды, қалған төртеуіне 15-20 жыл жаза сұраймыз", - деді Алинаның әпкесі.
Сот жабық режимде өтті. Туыстарының айтуынша, сот процесінде судья айыпты қайта қараған, себебі қыз өз-өзіне қол жұмсаған. Қайтыс болған қыздың туыстары апелляцияға берген. Олардың айтуынша, төрт қылмыскер бірнеше жылдан кейін шартты түрде мерзімінен бұрын босап шығуы мүмкін.
Олар қылмыскерлерде интернетке кіру мүмкіндігі бар екенін де айтып отыр. Алинаның әпкесінің сөзінше, олар әлеуметтік желілерде белсенді, өз парақшаларын жүргізіп отыр.
"Лада" басылымының мәліметінше, Маңғыстау облысының прокуратурасы қыздың өліміне қатысты сот үкіміне апелляциялық өтініш берген. Ведомство кінәлілерге жазаны қатаңдатуды талап етіп отыр.
Ведомство мәліметінше, 2024 жылғы желтоқсанда Маңғыстау облысының қылмыстық істер жөніндегі мамандандырылған ауданаралық соты марқұмға жасалған қылмыстар жиынтығы бойынша негізгі күдіктіге 20 жыл, ал оның төрт сыбайласына 7 жылдан 8,5 жылға дейінгі жаза тағайындаған.
Прокурор сот жарыссөзінде басты күдіктіге өмір бойы бас бостандығынан айыру, ал қалғандарына 15-16 жыл жаза сұраған.
Еске салайық, бұған дейін Ақтауда бірнеше ер адам бойжеткенді ұрлап әкетіп, мефедрон беріп, қорлық көрсеткені хабарланды. Жантүршігерлік жайт туралы НеМолчи.kz қоры мәлімдеді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
