ІІМ Қазақстаннан тыс жерде шетелдіктерге ЖСН беру туралы хабарландырулардан кейін тексеру жұмыстарын бастады. Бұл туралы "Ақ жол" партиясының депутаттық сауалына көші-қон қызметі комитетінің жауабында айтылған - деп хабарлайды Tengrinews.kz тілшісі.
Бұған дейін партия депутаттары Қазақстанда болмаған шетел азаматтарына ЖСН беру мәселесі бойынша ІІМ-ге сауал жолдаған болатын.
Жауапта ІІМ бұл факт бойынша тексеру жұмыстары басталғанын хабарлады.
"ІІМ әлеуметтік желілерді мониторингтеу барысында Қазақстан Республикасы аумағынан тыс жерлерде ЖСН алу мүмкіндігі туралы хабарландырулар мен түрлі қызметтерді анықтап отыр, негізінен Ресей азаматтарына қатысты. Осы факт бойынша жедел-іздестіру қызметі туралы заңнамаға сәйкес тексеру іс-шаралары жүргізіліп жатыр", – делінген жауапта.
Бұған дейін ІІМ 2024 жылы шетелдіктерге 435 408 ЖСН берілгенін хабарлаған болатын (оның ішінде: Ресей – 233 013, Өзбекстан – 121 719, ҚХР – 25 654, Тәжікстан – 13 846, Қырғызстан – 9 308).
Сілтемесіз жаңалық оқисыз ба? Онда Telegram желісінде парақшамызға тіркеліңіз!
