Шығыс Қазақстан облысының әкімі Ермек Көшербаев «Халықпен бірге!»барлық деңгейдегі әкімдерінің өңірлік форумына қатысты.
Облыста алғаш рет ұйымдастырылып отырған ауыл әкімдері форумының пленарлық отырысында аймақ елді мекендерінің әлеуметтік-экономикалық дамуына серпіліс беретін мәселелер талқыланды.
Сонымен қатар, «Amanat» партиясының алда тұрған негізгі мақсат-міндеттері талқыға түсіп, ондағы ауыл әкімдерінің атқарар жұмыстары сараланады. «Ауыл аманаты» және «Жер аманаты» партиялық жобаларын жүзеге асыруға қатысты мәселелер талқыланды. Жиналғандар ауылдарға қатысты мәселелерді айтып, атқарылған жұмыстарды қорытындылап, алдағы жоспарларды белгіледі.
- Ауыл, қала тұрғындарымен сөйлесіп, мәселені қысқа аралықта шешіп, ел тынысымен өмір сүретін басшы абыройсыз қалмайды. Халықтың алдынан өтіп, ел тынысымен өмір сүретін басшы абыройсыз қалмайды, - деді облыс әкімі.
Өңір басшысы Ермек Көшербаев мұндай форумдарды өткізүдің басты мәселесі – халықтың өмір сүру сапасын арттыру екенін атап өтті.
- Осы өңірдің тұрғындары ретінде, бізге – ішкі мәдениетті көтеріп, заң мен тәртіп үстемдігіне ерекше назар аударған жөн. Аудан және ауыл әкімдеріне елді-мекендерді абаттандыра отырып, қараусыз қалған апатты құрылыстарды жою, аудан орталықтары мен ауылдарды жарықтандыру мәселесін шешу негізгі міндет. Салық төлемі болсын, көше, аула тазалығына болсын не нәрседе де ұсақ-түйек болмауы керек. Мұның бәрі сіз бен біздің қолымызда. Ортақ абырой үшін бәріміз жұмыла еңбек етуіміз керек, - деп атап өтті облыс әкімі.
Форумға AMANAT партиясының хатшысы Ержан Жылқыбаев, барлық деңгейдегі әкімдер, облыстық мәслихаттың төрағасы мен депутаттары, басқармалардың басшылары, сондай-ақ БАҚ өкілдері қатысты.
Ержан Жылқыбаев өз сөзінде облыстың әлеуметтік-экономикалық дамуына тоқталып, халықтың нақты мәселелерін шешуге бағытталған партиялық жобалар туралы айтты.
– Қазіргі уақытта ауыл әкімдерінің форумы еліміздің барлық аймақтарында өтуде. Форумды ұйымдастырудағы басты мақсат – ауыл әкімдерінің жергілікті жерде халықпен қалай жұмыс істеу керектігін үйрету. Жан-жақты әдістемелік қолдау көрсету. Себебі ауыл әкімдері сол жердегі Президенттің тікелей өкілі деуге болады. Халық ауыл әкімінің жұмысы арқылы Үкіметтің жұмысына баға береді. Біздің партиядан сайланған әр әкімнің сапалы жұмыс жасауына барынша қолдау көрсету, біздің міндет осындай. Ауыл әкімдерін бірлесе белсенді жұмыс істеуге шақырамын. Бүгінгі форумда секциялық сессияларда ауыл әкімдері өздерінің ұсыныстары мен өтініштерін айтып, өзекті сұрақтарды ортаға салуға мүмкіндік алды. Ауқымды іс-шараның нәтижесі ауыл әкімдерінің қажырлы қызметіне жаңа серпін береді деп ойлаймын, – деді «Amanat» партиясының хатшысы Ержан Жылқыбаев.
Мемлекет басшысы Қасым-Жомарт Тоқаев өзінің 2020 жылғы 1 қыркүйектегі «Жаңа жағдайдағы Қазақстан: іс-қимыл кезеңі» атты Жолдауында ауыл әкімдерін тікелей сайлауды енгізу қажеттігі туралы мәлімдеген болатын. Осы орайда, өңірде 2021 жылдан бері 124 ауылдық округ пен 2 ауданда әкімдердің сайлауы өтті. Халық таңдаған әкімдердің 114 -і «Amanat» партиясының мүшелері болып табылады. Олардың қатарында тікелей халық сайлауы арқылы тағайындалған Алтай және Глубокое аудандарының әкімдері де бар.
