Майқайыңда шахтаға түсіп кеткен автобус табылды, - деп хабарлайды Tengrinews.kz тілшісі.
Павлодар облысы әкімінің баспасөз қызметі мәліметінше, "Майқайыңалтын" АҚ аумағында іздеу жұмыстары жалғасып жатыр.
"24 шілдеде кешке жұмыстар барысында құтқарушылардың автобусы табылды. Жаңбыр мен желге байланысты және құлау қаупіне байланысты жұмыстар аса сақтықпен жүргізіліп жатыр. Бүгін таңғы сағат 05:00-ден бастап іздеу жұмыстары қайта басталды", - деп түсіндірді әкімнің баспасөз қызметі.
Еске салайық, бұған дейін "Майқайыңалтындағы" үшінші құтқарушының денесі табылған болатын. Павлодар облысының әкімі Асайын Байханов марқұмның туыстарына көңіл айтты.
Өңір басшысы Telegram-да "Майқайыңалтын" АҚ тау-кен ауданындағы опырылған жерде тұрақты негізде аздаған үзілістермен іздестіру жұмыстары жүргізілгенін жазды. Соның нәтижесінде екі құтқарушының бірінің денесі табылды. Павлодар облысының ТЖД күшімен құтқарушының мүрдесі жер бетіне көтеріліп, жедел-тергеу тобына берілді.
Табылған жетон мен киімінен құтқарушылар взводы командирінің 36 жастағы орынбасары Айдос Шаймерденнің денесі табылғаны анықталды. Облыс әкімі Айдостың ата-анасына, оның жұбайы Нұрсұлуға, сондай-ақ, туыстары мен жақындарына көңіл айтты.
Ал 55 жастағы жүргізуші Айып Тілеубергеновтің денесі әлі табылған жоқ. Іздестіру жұмыстары жалғасып жатыр.
Сілтемесіз жаңалық оқисыз ба? Онда Telegram желісінде парақшамызға тіркеліңіз!
