რუსეთის თავდაცვის სამინისტრომ დღეს, 6 იანვარს განაცხადა, რომ სამხრეთის ჯარების ქვედანაყოფებმა „სრულად გაათავისუფლეს“ დონეცკის ოლქის ქალაქი კურახოვო(უკრაინულად კურახოვე).
სხვა წყაროებით, მათ შორის უკრაინის გენშტაბის მიერ ეს ინფორმაცია ჯერჯერობით დადასტურებული არ არის.
უკრაინის შეიარაღებული ძალების გენერალური შტაბის მიერ დილით გამოქვეყნებული მონაცემებით, გასულ 24 საათში კურახოვეს მიმართულებით 27 შეტევა მოიგერიეს.
კურახოვე მდებარეობს უკრაინის დონეცკის ოლქის დასავლეთში და შედის პოკროვსკის რაიონში, რომელსაც რუსეთის ჯარები ინტენსიურად უტევენ.
ბოლო დღეებში ყველაზე აქტიური საბრძოლო მოქმედებები მიმდინარეობდა ქალაქის დასავლეთ გარეუბნებში მდებარე თბოელექტროსადგურის და მილების ქარხნის რაიონში.
რუსეთის არმია უკრაინის ტერიტორიაზე 2022 წლის 24 თებერვალს შეიჭრა.
პრეზიდენტმა პუტინმა „სპეციალური სამხედრო ოპერაციის" მიზნად გამოაცხადა უკრაინის „დემილიტარიზაცია და დენაციფიკაცია".
უკრაინაში რუსული არმიის ფართომასშტაბიან შეჭრას წინ უძღოდა პუტინის მიერ უკრაინის ორი სეპარატისტული რეგიონის, დონეცკის და ლუგანსკის ე.წ. სახალხო რესპუბლიკების „დამოუკიდებლობის" აღიარება. მანამდე რუსეთმა მოითხოვა, რომ უკრაინა არ გახდეს ნატოს წევრი.
2022 წლის 30 სექტემბერს, რუსეთმა თავის ტერიტორიებად გამოაცხადა უკრაინის ხერსონის, ზაპოროჟიეს, დონეცკისა და ლუგანსკის ოლქები, თუმცა სრულად ვერცერთ მათგანს ვერ აკონტროლებს.
2014 წლიდან რუსეთის მიერ ანექსირებულია უკრაინის ყირიმის ნახევარკუნძული და ქალაქი სევასტოპოლი.
უკრაინას მიზნად გამოცხადებული აქვს ტერიტორიული მთლიანობის სრულად აღდგენა.
პუტინის ხელისუფლება ომის დასრულების პირობებად ასახელებს უკრაინაში უკვე ოკუპირებული ტერიტორიების რუსეთის ნაწილად აღიარებას და უარს ნატოში უკრაინის მიღებაზე.
