სოცქსელებმა, რომლებიც დაკავშირებული არიან დაჯგუფება „ჰაიათ ტაჰრირ ალ-შამთან“, სირიის ფაქტობრივ ლიდერთან, აჰმედ ალ-შარაასთან შეხვედრის ამსახველი ფოტოებიდან წაშალეს გერმანიის საგარეო საქმეთა მინისტრი ანალენა ბერბოკი.
„როგორც გვიჩვენებს ანალენა ბერბოკის ვიზიტი დამასკში, სირიის ახალ ხელმძღვანელობას აშკარად სერიოზული პრობლემები აქვს გავლენიან უცხოელ პოლიტიკოსებთან ურთიერთობაში“, ნათქვამია გერმანული ტელეარხის, N-tv-ს პუბლიკაციაში.
გერმანიის საგარეო საქმეთა სამინისტროს ხელმძღვანელის გარდა ფოტოებზე გაბუნდოვანებულია კიდევ ორი ადამიანი, სავარაუდოდ, თარჯიმანი ქალები.
ამასთან, სირიის სახელმწიფო საინფორმაციო სააგენტო SANA-მ, „ჰაიათ ტაჰრირ ალ-შამთან“ დაკავშირებული არხებისგან განსხვავებით, ბერბოკის სურათები ცვლილებების გარეშე გამოაქვეყნა.
მანამდე ყურადღება მიიპყრო ხელის ჩამორთმევის ეპიზოდმა. შეხვედრის კადრებში ჩანს, რომ ალ-შარაამ ხელი ჩამოართვა საფრანგეთის საგარეო საქმეთა მინისტრს, ჟან-ნოელ ბაროს, მაგრამ ბერბოკის შემთხვევაში იგი მხოლოდ მკერდზე ხელის მიდების ჟესტით შემოიფარგლა.
ყურანი არ კრძალავს ქალსა და მამაკაცს შორის ხელის ჩამორთმევას, მაგრამ მკაცრად რელიგიური მუსლიმები, როგორებსაც მიეკუთვნებიან „ჰაიათ ტაჰრირ ალ-შამის“ წევრები, მიიჩნევენ, რომ ასეთი მისალმება პირველი ნაბიჯია უხამსობისკენ, აღნიშნავს N-tv.
ისლამისტური დაჯგუფება „ჰაიათ ტაჰრირ ალ-შამი“ ტერორისტულ ორგანიზაციად არის აღიარებული აშშ-სა და მსოფლიოს სხვა ქვეყნებში. დაჯგუფებამ სირიაში 8 დეკემბერს აიღო ხელში ძალაუფლება. ჩამოგდებული პრეზიდენტი ბაშარ ალ-ასადი გაფრინდა რუსეთში, სადაც მას პოლიტიკური თავშესაფარი მიენიჭა. რუსეთის საგარეო საქმეთა სამინისტრომ 25 დეკემბერს განაცხადა, რომ მოსკოვი ღიაა კონსტრუქციული დიალოგისთვის სირიაში ყველა პოლიტიკური ძალის წარმომადგენლებთან.
ბერბოკი და ბარო დასავლეთის მსხვილი ქვეყნების პირველი საგარეო საქმეთა მინისტრები არიან, რომლებიც სირიის ახალმა ხელმძღვანელობამ მიიღო დამასკში. ორივე პოლიტიკოსის ვიზიტი ევროკავშირის სახელით განხორციელდა.
