28 დეკემბერს უკრაინასა და რუსეთში იყო ინტენსიური თავდასხმები დრონებით და შეტაკებები, პარალელურად უკრაინის პრეზიდენტმა, ვოლოდიმირ ზელენსკიმ სლოვაკეთის ლიდერს, რობერტ ფიცოს ბრალი დასდო კრემლისგან "ბრძანებების" მიღებაში კიევის და თავისი ხალხის საზიანოდ, ენერგეტიკასთან დაკავშირებული უთანხმოების გაღრმავების ფონზე.
"როგორც ჩანს, [რუსეთის პრეზიდენტმა, ვლადიმირ] პუტინმა ფიცოს დაავალა მეორე ენერგეტიკული ფრონტის გახსნა უკრაინის წინააღმდეგ, სლოვაკი ხალხის ინტერესების ხარჯზე" - წერს ზელენსკი სოციალური მედიით.
"ფიცოს მუქარა ამ ზამთარში უკრაინისთვის ენერგიის სამარაგო მიწოდების გაწყვეტაზე, მაშინ, როცა რუსეთი ჩვენს ენერგოსადგურებს და ინფრასტრუქტურას ესხმის თავს, მხოლოდ ამით შეიძლება აიხსნას".
ზელენსკის სიტყვების ფონია ფიცოს მიერ 27 დეკემბერს გაკეთებული განცხადება, რომ შეწყვეტს უკრაინისთვის ელექტროენერგიის მიწოდებას, თუ კიევი რუსული გაზის ტრანზიტს დაბლოკავს სლოვაკეთში.
უკრაინამ გამოაცხადა, რომ 1 იანვრის შემდეგ აღარ გააგრძელებს სატრანზიტო ხელშეკრულებას რუსეთის სახელმწიფო კომპანიასთან, გაზპრომთან - რაც ევროპის რამდენიმე ქვეყანაში შეწყვეტს გაზის მიწოდებას, იმ ფონზე, როცა დასავლეთი ცდილობს კრემლს აღარ ჰქონდეს ომის დაფინანსების ეს საშუალება.
სატრანსპორტო შეთანხმებას ხელი მანამდე მოეწერა, სანამ რუსეთი 2022 წლის თებერვალში სრული მასშტაბით შეიჭრებოდა უკრაინაში, და ევროპის ქვეყნების უმეტესობამ მას შემდეგ დაიწყო გაზის ალტერნატიული წყაროების მოძიება. მაგრამ ფიცო აცხადებს, რომ ალტერნატიული წყაროს მოძებნა სლოვაკეთისთვის ძალიან ძვირი იქნება.
ფიცო, უნგრეთის ლიდერთან, ვიქტორ ორბანთან ერთად, დასავლეთის გულისწყრომას იწვევს პუტინთან ახლო კავშირების შენარჩუნების გამო, აშშ-ის და ევროკავშირის სანქციების მიუხედავად. მიმდინარე კვირაში ფიცო პუტინს მოსკოვში ესტუმრა და უკრაინასა და რუსეთს შორის პოტენციური სამშვიდობო მოლაპარაკების მასპინძლობა შესთავაზა.
ზელენსკის თქმით, სლოვაკეთზე მოდის უკრაინის ელექტროენერგიის იმპორტის 20-მდე პროცენტი.
"სლოვაკეთი არის ევროპის ერთიანი ენერგეტიკული ბაზრის წევრი და ფიცომ უნდა დაიცვას საერთო ევროპული წესები" - წერს ზელენსკი.
პარალელურად, უკრაინიდან და რუსეთიდან 28 დეკემბერს ვრცელდება ცნობები დრონებით თავდასხმების და შეტაკებების შესახებ, ყველაზე მწვავე არეალი მოდის უკრაინის ქალაქ პოკროვსკის გარეშემო.
რუსეთის თავდაცვის სამინისტრომ 28 დეკემბერს გამოაცხადა, რომ მისმა ძალებმა ღამით გაანადგურეს უკრაინის 56 დრონი.
