Чăваш Енре Атăлçире пĕрремĕш ортопеди сиплевĕн ача-пăча корпусĕ уçăлмалла. Кун пирки Чăваш Республикин Пуçлăхĕ Олег Николаев Генрих Турнер ячĕллĕ наукăпа сăнав ача-пăча ортопеди институчĕн директорĕпе Сергей Виссарионовпа тĕл пулсан калаçрĕç.
Ортопеди сиплевĕн ача-пăча корпусне туни Федерацин травматологи, ортопеди тата эндопротезировани центрĕн ĕç-хĕлне те çăмăллатмалла. Пулăшу илекене, операци хыççăн корпусра вăй пухни, сиплеве тухăçлăрах тума май памалла. Тĕл пулура наукăпа сăнав проекчĕсене пурнăçласси пирки те калаçрĕç. Генрих Турнер ячĕллĕ наукăпа сăнав ача-пăча ортопеди институчĕ тин çуралнă пепкесен çурăм шăмми улшăнсан ăна йĕркене кĕртме пулăшакан хатĕр шутласа кăларнă. Вăл чикĕ леш енче тунисенчен хакĕпе самай йӳнĕрех. Ку институтпа Шупашкарти Федерацин травматологи, ортопеди тата эндопротезировани центрĕ тачă çыхăнса ĕçлет. 14 çулта çĕнĕ технологи хатĕрĕпе 8 000 пациента сипленĕ. Центр ертӳçи Николай Николаев пĕлтернĕ тăрăх, çурăм шăмми аманнă ачасене 120 таранах операци тăваççĕ. Унсăр пуçне шалкăм çапнă ачасене те сиплеççĕ. Институтпа центр малашне те тачă çыхăнса ĕçлеме палăртрĕç.
