МР-нь экономикань, микшнемань ды предпринимательствань Министерствась «Мой бизнес» куншкакуронть марто кирди Мордовиянь предпринимательтнень. Истя, «Малое и среднее предпринимательство и поддержка индивидуальной предпринимательской инициативы» раськень теварсевксэнть вельде лезэ максозь Анастасия Скворцованень, кона сты мирденень лисемань палят ды эйкакшонь оршамопельть. Эсензэ тевень 10 иеде икеле ушодозь, тейтересь ютызе кинть сырькаензэ марто ставтозь васенце оршамопьстэ саезь Московсо раськеютконь пек покш невтемасо улемас. Ещё од иестэ Анастасия содавтовсь мирденень лисемань палянь стамонь искусстванть марто.
«Свал бажинь явомс тенень мель, ды сырькаем лездась монем, минь вейсэ арсинек оршамотнень. Седе тов, 7-це классо, невтема вальмасо мон неить пиже карькс марто паля. Монем сон пек мелезэм тусь, ды арсинь, зярдо касан, монсь карман тееме палятнень дизайнанть», — ледстни предпринимателесь.
— «Истя лисськак, ней монь эсень производства ды лавка». Урьвакстомань мирденень лисемань салононь кастомасо покш лезэ макссь «Мой бизнес» куншкакурось, кона питневтеме лездась муемс тевветямонь сюлмавомат, бизнесэнь икелев молемасо ды производствань келейгавтомасо. Куншкакуронть лезксэнзэ вельде Анастасия невти ставкстнэнь 84 невтематнесэ, саи содыцятнень пельде превс путомат ды ламо лия. Весе те лездась сонензэ ливтемс микшнематнень од сэрьс. Маласо шкасто предпринимателесь арси панжомс од тарка, косо карми стамонь цех, онкстамонь тарка ды лавка. Те карми сонзэ бизнесэнь кастомасо покш эскельксэкс. А эряви стувтнемс, раськень теварсевксэнть лезксэнзэ кувалт «Технопарк-Мордовия» АУ-нь инжинирингень Региононь куншкакурось лездась Анастасия Скворцованень теемс ставтозь микшнемапельтнес сертификат. «Пек паро, што раськень теварсевксэсь панжи монь бизнесэнтень од кить. Кирдемавтомо монем те а топавтоволь», — тешксты Анастасия.
