«Մեդիալաբի» հարցերին պատասխանում է վրացագետ Ջոնի Մելիքյանը
– Պարո՛ն Մելիքյան, ի՞նչ ներքաղաքական իրավիճակ է հարևան Վրաստանում, հետընտրական ի՞նչ զարգացումներ եք կանխատեսում։
– Այնտեղ սկսվել են հետընտրական գործընթացներ, որոնք ավելի թույլ են, քան չորս տարի առաջ, դեռևս միասնություն չի երևում։ Առաջին դերում Սալոմե Զուրաբիշվիլին է, որը լավ օրից չէ, և դրա պատճառով տեխնոկրատ կառավարություն ձևավորելու իր առաջարկած պարտիան արդեն երևում է, որ չի ստացվում, քանի որ այդ դեպքում ընդդիմությունը պետք է իշխանությունից ավելի շատ ձայներ ստանար:
Իշխանությունները փորձելու են հստակ պահել իրենց հաղթանակը, եթե լուրջ խախտումներ ի հայտ չգան, որոնք կարող են արդյունքները փոխել: Եթե ԵԱՀԿ/ԺՀՄԻԳ-ը, որն ընտրությունների արդյունքներին գնահատական տվող առաջատար կառույցն է ու կարևոր դեր է խաղում ժողովրդավարական պետությունների համար, որևէ բացասական բան չասի, ապա կստեղծվի մի իրավիճակ, երբ ընդդիմությունը պետք է փորձի փողոցային պայքարով իշխանության հասնել, կամ արտահերթ ընտրությունների գնան, ինչը քիչ հավանական եմ համարում, կա՛մ պետք է որոշում կայացնեն մանդատները վերցնել ու խորհրդարանում հանդես գալ իբրև ընդդիմադիր գործիչներ։
Ամենամեծ խնդիրն ու ինտրիգն այն էր, որ այս տարիներին չձևավորվեց այլընտրանքային բևեռ, որը նոր, տեխնոկրատ, նախկին ուժերի հետ որևէ առնչություն չունեցող քաղաքական ուժ կլիներ։
Երևաց նաև այն, որ ժողովուրդը, հոգնած լինելով իշխող կուսակցությունից, բայց որոշ շրջանակներ, որոշ նարատիվների ու թեզերի արդյունքում, որոնց վառ ապացույցն է՝ չցանկանալ կոնֆլիկտ, իշխանությունն ի սկզբանե թիրախավորեց «կայունությունն ու խաղաղությունը», որոնք նախընտրական շրջանում ամենաշատ կիրառվող բառերն էին, իր արդյունքը տվեց: Այդ արևմտամետությունը, որը հաշվարկված էր ընդդիմության կողմից, այնուամենայնիվ, արդյունք չտվեց, որովհետև առաջնայինը, ինչպես նաև արդյունքները ցույց տվեցին, երկրի ներսում կայունություն ու խաղաղություն ունենալն է, հետո նոր մնացյալ հարցերը։
ԱՄՆ-ից ու Բրյուսելից հայտարարությունները ցույց են տալիս, որ դեռևս տեղ են թողնում վերականգնման պրոցեսին, այսինքն՝ կամուրջներն այրված չեն, ինչը նաև դրական է Հայաստանի համար, քանի որ Թբիլիսիի արտաքին քաղաքականության մեջ բոլոր կտրուկ քայլերը ինչ-որ չափով սահմանափակելու են տնտեսական ու քաղաքական դիվերսիֆիկացման մեր հնարավորությունները, հետևաբար եթե պահպանվի այն ստատուս քվոն, որը գոյություն ուներ մինչև այս ընտրությունները, ապա Հայաստանի համար ավելի ձեռնտու կլինի։
– Համակարծի՞ք եք հնչող հայտարարություններին, որ այս ընտրությունների արդյունքով ժողովրդավարությունը տուժեց Վրաստանում, իրականում Ռուսաստանն այնտեղ հաղթեց:
– Ես նման զարգացումներ չեմ տեսնում, Ռուսաստանի դերը գերագնահատված է, շատ դեպքերում հենց Ռուսաստանից հնչող հայտարարությունները նպատակ ունեն իրենց դերը մեծացնելու։ Եկեք իրատես լինենք ու հասկանանք գործընթացներն այնպես, ինչպես կան, այլ ոչ թե այնպես, ինչպես փորձում են մեզ ներկայացնել։
– Պարո՛ն Մելիքյան, ճի՞շտ հասկացա, որ հավաքական Արևմուտքը փորձում է Վրաստանի նորընտիր իշխանության հետ լեզու գտնել։
– Դեռևս չի փորձում ինչ-որ բան վերականգնել, չէի ասի նման բան, կոշտ հայտարարություններ արվում են, բայց այնքան կտրուկ չեն, որ Վրաստանի իշխանություններն ասեն՝ լավ, եթե այդպես է՝ մենք մեր գլխի ճարը տեսնենք։ Այս իշխանությունները ևս դեռ տեղ են թողել ու ընտրություններից առաջ էլ ասում էին, որ հունվարից հետո կվերականգնեն հարաբերությունները, նկատի ունենալով, որ ԱՄՆ ընտրությունները կավարտվեն, նոր վարչակազմ կլինի, և արդեն իրենց հարցերը կկարգավորեն։
Հիմա կլինեն դեմոկրատականնե՞րը, թե՞ հանրապետականները, պարզ է, որ Վրաստանի իշխանությունների համար նախընտրելի կլինի Թրամփը, բայց եթե նույնիսկ Հարիսն ընտրվի, ճիշտ է, մի քիչ դժվար ուղի կունենան, բայց, այնուամենայնիվ, հարաբերությունները կվերականգնեն, նրանք շահագրգռված են դրանում։
Քրիստինե Աղաբեկյան
MediaLab.am
The post Եթե պահպանվի այն ստատուս քվոն, որը գոյություն ուներ Վրաստանում մինչև այս ընտրությունները, ապա Հայաստանի համար ավելի ձեռնտու կլինի. Ջոնի Մելիքյան first appeared on MediaLab Newsroom-Laboratory.
