Birleşken Milletler Baş Assambleyası Ukrainanıñ işğal etilgen Qırım, Qara ve Azaq deñizleriniñ Rusiye tarafından askeriyleştirilüvi qararını qabul etti. Oña 66 memleket qoltuttı, 19 – qarşı çıqtı, 72 – bitaraf oldı.
Qarar leyhasını Ukraina Tış işler naziriniñ muavini Sergiy Kıslıtsâ taqdim etti.
Rezolütsiya Rusiyeni Qırımdan askerlerini çıqarmasına çağıra ve Qara ve Azaq deñizlerinde Rusiye askerleriniñ sayısı arttırılğanını takbih ete.
BM Baş Assambleyasınıñ toplaşuv salonında Ukraina prezidentiniñ qırımtatar halqı işlerinden vekâletlisi Mustafa Cemilev de bar edi.
Vesiqağa qarşı Rusiye çıqtı. İran ve Suriye qarar metnine tüzetmeler kirsetmege tırıştı, lâkin olarnı Ukrainanıñ ortaq memleketleri red etti.
Litvaniya, Estoniya, Latviya, Poloniya, Felemenk, Büyük Britaniya, ABD ve diger memleketler Ukraina rezolütsiyasınıñ leyhasına qoltuttı.
Noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Rusiye FSBsi Ukraina gemilerine qarşı silâ qullanğanını tasdıqladı, mında berilgen malümatqa köre, üç Ukraina cenk gemisi noyabrniñ 25-nde «Rusiye devlet sıñırından qanunsız keçti».
Aqmescit ve Keriç mahkemeleri 24 Ukraina deñizcisini apiske aldı. Olar 2019 senesi yanvarniñ 25-ne qadar apiste qalacaqlar. Ukraina deñizcileri 6 yılğa azatlıqtan marum qala bile. Qırım yalısında zapt etilgen Ukraina deñizcileri noyabrniñ 27-nde Rusiye Ceza kodeksiniñ 322-nci maddesiniñ 3-ünci qısmına istinaden (sıñırdan qanunsız keçiş) qabaatlandı. Esir alınğan Ukraina askerleri Moskvağa avuştırıldı.
Rusiyeniñ Keriç boğazında yapqanlarını bir sıra Avropa memleketi ve ABD tenqit eteler. NATO, vaziyetni ve Keriç boğazındaki adiselerni diqqatnen közetkenini bildirip, ağır-sabırlı olmağa ve vaziyetniñ daa beterine yol açmamağa çağırdı.
