Apiste tutulğan Bağçasaraydaki «Hizb ut-Tahrir davasınıñ» mabüsi, «Qırım birdemliginiñ» koordinatorı Server Mustafayevni psihiatrik hastahanege avuştırıp, «aqlı yerindemi-yoqmı qarar çıqaracaq olalar». Bu aqta apiste tutulğan faalni ziyaret etken advokatı Sergey Legostov Qırım.Aqiqatqa bildirdi.
İmayeciniñ malümatına köre, Mustafayev Qırımnıñ cumhuriyet psihiatrik hastahanesiniñ 15-inci bölüginde mahkeme-psihiatrik ekspertiza bölüginde buluna.
Legostovnıñ qayd etkenine köre, Mustafayev anda dekabrniñ 13-nde yerleştirildi.
«Saba uyandırıp ketirgenler, baqqanlar, ekimni aytqanlar. Mında 2019 senesi yanvarniñ 10-na qadar qalacaq. Maqsat – Serverni baqıp ve közetip, aqlı yerindemi-yoqmı qarar çıqarmaq», – dedi Legostov.
Mustafayev psihiatrik hastahanege avuştırılmasını «cezalandırıcı psihiatriya» dep adlandırdı.
Dekabrniñ 13-nde saba qırımlı uquqçı Lilâ Gemeci bildirdi ki, Mustafayev psihiatrik hastahanege yollanıla. Rusiyeniñ cezalarnı yerine ketirüv federal hızmeti bu malümatnı daa izaatlamadı.
«Qırım birdemligi» cemaat teşebbüsiniñ koordinatorı Server Mustafayev ve qırımtatarı, musulman Edem Smailov 2018 senesi mayısnıñ 21-nde Qırımda Rusiye uquq qoruyıcıları tarafından tutulğan edi. Olarnıñ davası Bağçasaraydaki «Hizb ut-Tahrir davasına» ilâve etildi.
Dekabr ayında Aqmescitniñ Rusiye mahkemesi Mustafayev ve Smailovnıñ apis müddetini eki ayğa uzattı. Olar 2019 senesi fevralniñ 9-na qadar SİZOda qalacaqlar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
