Rusiye prokurorı Bağçasaraydaki birinci «Hizb ut-Tahrir davasınıñ» mabüsleri Zevri Abseitov, Remzi Memetov, Rustem Abiltarov ve Enver Mamutov içün 10 yıldan 17 yılğa qadap sert rejimli koloniyada apis cezası berilmesini istedi. Bu aqta dekabrniñ 11-nde Rostov-na-Donudaki (Rusiye) Şimaliy-Kavkaz okrugınıñ arbiy mahkemesinde qabaatlayıcı bildirdi. Prokuror, mabüsler «Hizb ut-Tahrir» mefküresini beraber ögrengenini aytıp, Mamutov «terror teşkilâtınıñ bölük teşkilâtçısı ola» dedi.
Şu sebepten qabaatlayıcı onıñ içün 17 yıl sert rejimli koloniyasında qalmasını istedi. Remzi Memetov içün prokuror 12,5 yıl sert rejimli koloniyasında qalmasını, Rustem Abiltarov ve Zevri Abseitov içün ise 10 yıl sert rejimli koloniyasında qalmalarını istedi.
«Bugün prokuror munaqaşadaki sözüni bitirdi, yarın bu aq bizge berilecek. Biz munaqaşalarda çıqışta bulunacaqmız, mabüslerimiz sözge çıqacaq. Mabüslerniñ soñki sözüne keçecekmiz», – dep bildirdi advokatlardan biri Oleg Generalov. 2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
