Qırımda «dekabrniñ 12-ne keçer gecesi ava bozulğanı içün» bir sıra regionnıñ sakinleri ışıqsız qaldı, dep bildire «Krımenergo» müessisesi.
Olarnıñ malümatına köre, elektrik ağı hocalığınıñ obyektlerinde tehnologiya bozuvlar oldı, şu sebepten elektrik berilmesi sıñırlandı.
Saba saat 9-da 138 meskün yer – 11,2 biñ bala olğan 37,9 biñ insan elektriksiz qaldı, dep bildire Qırım qurtarıcıları.
Eñ çoq Canköy, Qurman ve Seyitler rayonları zarar kördi.
«Krımenergo» müessisesiniñ matbuat hızmeti qayd ete ki, bazı obyektlerde elektrik teminlevini ğayrıdan tiklev işlerini keçirmek içün sılaq qar ve buzlavuq qıyınlaştıra.
Qırımda çarşenbe künü, dekabrniñ 12-nde, yağmur, bazı yerlerde sağanaq, sılaq qar yağacaq. Bu aqta yarımadanıñ gidrometmerkezi bildire.
