Dekabr 6-sında Kreml nezareti altındaki Aqmescit Kiyev rayonı mahkemesi, Qırımda zapt etilgen advokat Emil Kürtbedinovnıñ memuriy uquq bozuv yapqanında qabaatlavnı baqacaq. Bu aqta Qırım.Aqiqatqa advokat Edem Semedlâyev bildirdi.
“Oturış bugün olacaq. Men bellesem, bir saatten (Qırım vaqtınen 17:00). Vesiqalarnı yañ ketirdiler. Oturış Aqmescit Kiyev rayonı mahkemesinde keçirilecek. Oña para ya da 15 künlük apis cezasını mahküm ete bileler”, - dep ayttı Semedlayev.
Qırım.Aqiqat muhbiriniñ malümatına köre, Rusiye ve Qırım habercileri mahkeme oturışınıñ başlanuvını bekley.
Dekabr 6-sında Rusiyeniñ ekstremizm ile küreş merkeziniñ hadimleri advokat Emil Kürbedinovnı tutıp aldı. Onı Rusiyeniñ memuriy uquq bozuvları aqqında kodeksiniñ 20.3 maddesine köre qabaatlaylar.Advokatqa 2013 senesi Facebookta derc etilgen yazı içün memuriy tevfiq mahküm etile bile. Kürbedinovğa çaquvnı şimdi Dimaşqta yaşağan sabıq Qırım sakini yazdı.
Qırımda Rusiye İçki İşler Nazirliginiñ idaresi bu malümatnı tefsir etmey.
Rusiyeniñ Ekstremizm ile küreş merkeziniñ hadimleri ve üyken prokuror Valentin Çuprina Emil Kürbedinovnı ekstremizm ve terrorizm qanunları bozulamaz, dep tenbiyelegen edi.
Oktâbrniñ 27-nde Aqmescitte «Qırım birdemligi»niñ toplaşuvında Rusiye prokuraturasınıñ hadimleri, kimligi belli olmağan maskalı insanlar ve politsiya hadimleri keldi.
İşğalden soñ Qırımdaki Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
