Qırımda, Keriç boğazında Rusiye zapt etken ukrain deñizcilerine yardım etmek içün 265 biñ rubleden (113 bin grivnadan çoq) çoq cıyıldı dep noyabr 30-ında qırımtatar milliy areketiniñ faali Nariman Celâl haber etti.
Onıñ aytqanına köre, qırımlılar, aqçalarnı naqıt paranen ve bank kartalarına yollap bere edi.
Facebook saifesinde Celâl, yardım muracaatına bitaraf qalmağanlağa minnetdarlığını bildirdi ve arbiylerge yollanılacaq eşyalar endi cıyılıp zaır turğanını qayd etti.
“Dostlar, ukrain deñizcilerine yardım etmek içün 100 biñ rublege qadar elime berilgen edi ve 14.45 30.11.2018 - 165 463 ruble. Kiwi-kisege 131 ödev keldi. Bilem, kimerleri bir qaç kere aqça yolladı. Er deñizcige ekişer balaban çanta topladıq. Çoq sağ oluñız!”, - yazdı Celâl.
Noyabr 27-sinde salı künü faaller, Keriç boğazına zapt etilgen deñizcilerge yardım etmek içün para toplanmasını ilân etti.
Ukraina Arbiy deñiz quvetleri bildirgenine köre, noyabrniñ 25-nde Rusiyeniñ sıñır gemileri Odesa limanından Azaq deñizinde Mariupolge keçken Ukraina Arbiy deñiz quvetleriniñ gemilerine qarşı «açıq istilâiy areketler» kerçekleştirdi. Rusiyeniñ «Don» sıñır kateri Ukraina Arbiy deñiz quvetleriniñ «Yañı Qapu» reyd buksirine aselet çarptı.
Qırımdaki Rusiye FSB idaresi bildirgenine köre, noyabrniñ 25-nde Ukrainağa ait üç arbiy gemi «Rusiyeniñ devlet sıñırından qanunsız» keçip, Keriç boğazı yolunda «telükeli areketler» yaptı.
Kreml nezareti altındaki Aqmescitniñ Kiyev rayon mahkemesi, Keriç boğazında tutılğan Ukraina deñizcileri ve Ukraina telükesizlik hızmetiniñ hadimlerini 2019 senesi yanvarniñ 25-ne qadar tevqif etti. Keriç hastahanesinde yaqtqan daa üç deñizcini Keriç şeer mahkemesi tevfiq etti. Olar da 2019 senesi yanvar 25-ine qadar apiste bulunacaq. Ukraina askerleri 6 yılğa azatlıqtan marum qala bile.
QMC prokuraturası FSB tutqan ukrain deñizcilerini cenk esiri dep saya.
Noyabrniñ 26-nda Ukraina Yuqarı Radası Keriç boğazında Rusiye arbiyleri tarafından Ukraina gemilerine açılğan ateş sebebinden bir qaç vilâyette cenk vaziyetini ilân etti.
Rusiyeniñ Keriç boğazında yapqanlarını bir sıra Avropa memleketi ve AQŞ tenqit eteler. NATO, vaziyetniñ ilerlevüne diqqatnen közetkenilerini ve kerginleşkenine yol bermemek içün tedbirler azırlaycağında işandırdı.
