2018 senesi noyabr 30-ından Ukraina Devlet sıñır hızmeti, Ukrainağa 16 yaşından 60 yaşına qadar Rusiye erkek vatandaşlarına kirişni yasaqladı. Bu sıñırlayıcı tedbirler tek Rusiye vatandaşlarına ait ve bir qaç vilâyette cenk vaziyeti ilân etilgeni sebebinden kirsetildi. «Keçiş noqtalarında kontrol tedbirleri quvetleştirildi. Bugünki künde çetel vatandaşları, hususan Rusiye Federatsiyası vatandaşlarınıñ kirmesi sıñırlandı. 16 yaşından 60 yaşına qadar Rusiye erkek vatandaşları kirsetilmey», – dep bildirdi Ukraina Devlet Sıñır Hızmetiniñ başı Petro Tsigikal. Aynı vaqıtta Rusiyede Ukraina vatandaşlarına nisbeten sıñırlav yoq. Ukraina Devlet sıñır hızmeti, al-azırda işğal etilgen Qırımğa ancaq Ukraina pasportlarınen kirmek mümkün, dep bildirgen edi. Çetel vatandaşları yarımadağa alınmay.
