Kyivde faaller ve aq qorçalayıcılar Rusiyede ve işğali altındaki Qırımda qanunsız tutılğan siyasiy mabüslerge qoltutmaq maqsadınen Halqlarnıñ dostluğı kemerinde timsaliy çatlağınıñ resmini yaptı.
«Dostluq çatlağı» adlı aktsiyanıñ matbuat risalesinde denile ki, aktsiyanıñ maqsadı – Rusiyede siyasiy sebeplerden mahküm etilgen Ukraina vatandaşlarınıñ taqdirine diqqat celp etmek.
«Oleg Sentsov ve Volodımır Baluh açlıqnı toqtatqan soñ qanunsız tutılğan Ukraina vatandaşlarınıñ mevzusı dünya matbuatınıñ serlevalarından, yüksek seviyeli körüşüvlerniñ kün tertibinden yoq oldı. Olarnı unutmasınlar dep, daa çoq ğayret köstermeli. Halqara toplulıq ve Ukraina «er şey yerinde kibi» tüşünmemeli. Oleg Sentsovnıñ açlıq narazılığına başlağanda ilân etken talabı alâ daa yerine ketirilmedi. Kreml esirleri apiste qala, olarğa qarşı esnaslar devam ete, uydurılğan davalarnıñ mahkemeden evel tahqiqatları devam ete», – dep aytıla Facebookta derc etilgen vesiqada.
Bundan evel Latviya prezidenti Raymonds Veyonis Rusiyeni ukrainalı siyasiy mabüslerni acele azat etmesine çağırdı.
Ukraina Yuqarı Radası reisiniñ birinci muavini İrına Geraşçenko bildirgenine köre, Ukraina, Rusiyede ve işğal etilgen Qırımda tutılğan ukrainalı reine ve siyasiy mahkümler azat etilsin dep, Ukraina devletine qarşı cinayet işlegen 60 Rusiye vatandaşını bermege azır.
Aq qorçalayıcılarnıñ malümatına köre, tahminen 60 Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum etildi. Ukraina Tış işler nazirligi, Rusiyege 300 kerege yaqın narazılıq bildirip, anda olğan ukrainalılarnı azat etmesini talap etken edi.
