Noyabr 3-4 künleri, Türkiyege ziyareti vaqtında, Ukraina prezidenti Petro Poroşenko, Yüksek seviyeli Strategik şuranıñ oturışında iştirak etecek.
Noyabr 3-ünde İstanbulda keçecek oturışnıñ ekinci reisi Türkiye prezidenti Recep Tayyip Erdoğan olacaq.
“Tedbirniñ kün tertibine köre, eki taraflı siyasiy qonuşmanıñ esas meselelerniñ muzakeresi, ticariy-iqtisadiy, ilmiy-tehnikiy, mudafaa-sanayı, energetik, naqliyat, medeniy-gumanitar, tasil ve turistik saalarında Ukraina ve Türkiye işbirliginiñ şimdiki alı ve inkişaf istiqballeri aqqında muzakereler keçirilecek”. - dep qayd ettiler Poroşenkonıñ matbuat hızmetinde.
Ukraina devlet başı ayrı muzakere Erdoğannen keçirecek.
“Ukrain devletiniñ başı, 1919-1922 senelerinde Ukraina Milliy Cumhuriyetiniñ (UNR) diplomatik missiyasınıñ sabıq binasında hatıra tahtasını açacağı, ukrain tili ve edebiyatı bölügi mevcüt olğan İstanbul Universitetini ziyaret etecegi, ve Ukraina ve Türkiye arasında diplomatik munasebetlerniñ100 yıllığına bağışlanğan arhiv vesiqaları sergisini açacağı beklenile”, - dep aytıla beyanatta.
Poroşenko, “Ukrain evi” medeniy merkezi ve Antaliyada Ukraina konsullığınıñ inauguratsiya merasiminde iştirak etecegi közde tutula.
Bu yılnıñ sentâbr ayında Poroşenko BM Baş assambleyasınıñ 73-ünci sessiyasında Erdoğan ile körüşip, Türkiye zenaatdaşını Kremlniñ siyasiy esirleri olğan Ukraina vatandaşlarınıñ azat etilmesine yardım etmege çağırdı.
