Oktâbrde ukrain sıñırcıları, ilhaq etilgen Qırım memuriy sıñırından keçken adamlarnıñ sayısı eksilgenini qayd etti.
Ukraina Devlet sıñır hızmetiniñ matbuat hızmeti haber etkenine köre, devlet sıñırındaki ve kiriş-çıqış noqtalarındaki pasport nezareti vaqtında, bütün olaraq 88 adamnıñ keçmesi yasaqlandı, olardan 58-zi - memuriy sıñırda. Bundan ğayrı, 4 sahte ve 26 maqbul olmağan pasport tapıldı.
Qıta Ukrainanen Qırım memuriy sıñırında eki tarafqa, episi olıp, 205 biñ insan qayd olundı, bu, 2017 yılınıñ aynı vaqıt müddetine köre raqamlarına köre, 7%-ğa azca.
Ukraina Devlet sıñır hızmeti, Qırımğa kiriş qaidelerini bozğan 40-qa yaqın insan tapılğanını bildirdi.
“Sıñırcılar, olardan 6-sında silâ ve çeşit kalibrli arbiy yedeklerniñ sıñırdan keçirmek ıntıluvnı belgiledi. Bundan ğayrı, Qırım Muhtar Cumhuriyetine, “Kalançak” kiriş-çıqış noqtasından qaçınıp keçmege istegen bir adam tutıldı”, - dep aytıla beyanatta.
Avgustnıñ 21-nde Devlet sıñır hızmetiniñ Aqaz-Qara deñiz bölgesiniñ idaresi, rusiyeli Qırım akimiyeti Ukrainanıñ qıta qısmından kelgen turistlerniñ sayısını qabarta dep haber etti Qırım.Aqiqatqa .
Daa evel Rusiye ve Qırım matbuatları, turizm komitetiniñ başı Aleksey Çernâknıñ sözlerinden, avgustnıñ başınace Qırımda 830 biñ Ukrainanıñ qıta qısmından kelgen turist raatlandı dep bildirgen edi.
2014 senesiniñ başında Qırım Rusiye tarafından ilhaq etilgen soñ Ukrainanıñ qıtadaki qısmı ile yarımada arasında şeklen memuriy, lâkin kerçekte aqiqiy olğan sıñır keçti. Herson vilâyetinde Qırım ile memuriy sıñırda üç kiriş/çıqış kontrol noqtası çalışa – «Kalançak», «Çonğar» ve «Çaplınka».
