Kyivde oktâbrniñ 29-nda Rusiyeniñ Qırım işğalinden soñ babaları ğayıp olğan ya da Rusiye uquq qoruyıcıları tarafından tutulğan balalarnıñ ikâyeler cıyıntığı taqdim etildi. «Babam – qaramandır» adlı buklet inglizce Qırımtatar resurs merkezi ve Qırımtatar Milliy Meclisiniñ yardımı ile neşir etildi.
Qırımtatar resurs merkeziniñ yolbaşçısı Eskender Bariyevniñ aytqanına köre, «Babam – qaramandır» yarışı 2017 senesi Qırımda keçirildi. İşbu yarış çerçivesinde balalar tarafından yazılğan inşalar ingliz tiline tercime etildi ve neşirge azırlanıldı.
«Yüzden ziyade bala Qırımnı zapt etken memleketniñ repressiya qurbanı ola. Balalar raatsız, biz olarğa qoltutmaq kerekmiz», – dedi Eskender Bariyev.
Bariyevniñ qayd etkenine köre, cıyıntıqnı italyan tiline çevirip, Qırımda böyle yarışlarnıñ keçirilmesini devam ettirmege planlaştıralar.
«Bizim balalar» hayriye vaqfınıñ malümatına köre, 100-den ziyade qırımtatar balası babasınıñ vasiyligini körmey, babaları siyasiy sebeplerden apiske alınğan edi.
Aq qorçalayıcılarnıñ qayd etkenine köre, 60-tan ziyade Ukraina vatandaşı Rusiyede ve işğal etilgen Qırımda siyasiy sebeplerden azatlıqtan marum qaldı. Ukraina Tış işler nazirligi anda tutulğan ukrainalılarnı azat etmek talabınen Rusiyege 300-ge yaqın narazılıq notasını yollağan edi.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
