Oktâbrniñ 27-nde Aqmescitte «Qırım birdemliginiñ» toplaşuvında Rusiye prokuraturasınıñ hadimleri, kimligi belli olmağan maskalı insanlar ve politsiya hadimleri keldi, dep haber ete Qırım.Aqiqat mühbiri.
Prokuratura vekilleri «Qırım birdemliginiñ» koordinatorlarından biri, Bağçasaraydaki «Hizb ut-Tahrir davasınıñ» mabüslerinden biriniñ oğlu Dilâver Memetov ve qırımlı uquqçı Lilâ Gemecige keldi.
«Prokuratura hadiminiñ esas talabı – Lilâ Gemeci ve Dilâver Memetovnıñ ekstremizm teşkerüvi çerçivesinde kelmesidir», – dep ayttı mühbir.
Mühbirniñ bildirgenine köre, maskalı insanlar özüni tanıtmadı. Daa soñra ekstremizm ile küreş merkeziniñ hadimleri olğanı ögrenildi.
«QB toplaşuvı devam ete, amma Ekstremizm ile küreş merkeziniñ hadimleri kirişte bekley. İlk malümatqa köre, insanlar («Qırım birdemliginden» – QA) Lilâ ve Dilâvernen beraber prokuraturağa ketecek ola», – dep ayttı Qırım.Aqiqat mühbiri.
Qırımdaki Rusiye uquq qoruyıcı hızmetleriniñ saytlarında şimdilik bir malümat yoq.
İşğalden soñ Qırımdaki faktik Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
