Keriçteki faciada yaralanıp Qırım hastahanelerinde bulunğan 25 insannıñ alına ekimler qıymet kesip, stabil olğanını aytalar, dep bildire Qırım sağlıq nazirliginiñ matbuat hızmetine esaslanıp Rusiye haber agentligi.
«Keriçteki kollec faciasında yaralanğanlarnıñ alı stabil olıp qala, sağlıqlarınıñ fenalaşması qayd etilmey. Çarşenbe sabası cumhuriyet hastahanelerinde 25 insan buluna», – dep yaza nazirlikniñ malümatını TASS.
Rusiye ve ilhaq etken Qırım hastahanelerinde Keriçteki ücümde yaralanğan 47 insan buluna. Qırım hastahanelerinde Keriçte yaralanğan 14 genç ve 11 büyük qala.
Oktâbrniñ 17-nde, çarşenbe künü, Keriç politehnik köllecinde patlav ve atışuv oldı. Rusiye Tahqiqat komitetiniñ malümatına köre, Keriç politehnik kollecinde olğan patlavnı 4-ünci kurs studenti, 18 yaşında Vladislav Roslâkov kerçekleştirdi. O, «özüni öldürdi». Facia neticesinde 21 insan elâk oldı. Qırımda üç künlik matem ilân etilgen edi.
Oktâbrniñ 19-nda Keriçte ve Yedi Quyu rayonında ücüm qurbanlarınıñ cenazeleri qılındı. Vedalaşuv merasimine biñlernen insan keldi.
Qırım Muhtar Cumhuriyetiniñ prokuraturası Keriç politehnik köllecinde olğan patlavnı terror ücümi olaraq tasnif ete.
