Rostov-na-Donu şeerindeki Şimaliy-Kavkaz okrugınıñ arbiy mahkemesi Bağçasaraydaki «Hizb ut-Tahrir davasınıñ» mabüslerine nezaret altında bulunma müddetlerini üç ayğa uzattı. Bu aqta oktâbrniñ 9-nda Qırım.Aqiqat mühbiri bildire.
Zevri Abseitov, Remzi Memetov, Rustem Abiltarov ve Enver Mamutov yanvarniñ 11-ne qadar Rostov-na-Donu SİZOsında qalacaqlar.
«Oktâbrniñ 11-nde – 3 künden soñ – evelki nezaret altında tutuv müddeti bite, prokuror tevqif müddetini 3 ayğa uzatmaq muracaatını berdi. Mahkeme bunı qanaatlendirdi ve nezaret altında qalma müddetlerini 2019 senesi yanvarniñ 11-ne qadar uzattı», – dep ayttı advokat Sergey Legostov.
2016 senesi mayısnıñ 12-nde Bağçasarayda Rusiye telükesizlik hadimleri musulmanlar, qırımtatarlarnıñ evleri ve yerli qavehanede bir sıra tintüvler keçirdi. Neticede Bağçasaraynıñ dört sakini: Zevri Abseitov, Remzi Memetov, Rustem Abiltarov ve Enver Mamutov tutulıp, terrorizmde qabaatlandı. Olar, Rusiyede terroristik dep tanılğan «Hizb ut-Tahrir» teşkilâtında iştirak etkenlerinde şübeli dep sayıla.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
2014 senesi Rusiye Qırımnı işğal etken soñ Qırım musulmanları diniy idaresi yapqan areketlerini Qırımtatar Milliy Meclisi ile muzakere etmeyip, Rusiye qanunlarına köre Qırım ve Aqyar musulmanları diniy idaresi olaraq qayd oldı.
2016 senesi noyabr ayında Qırımda köçip kelgen musulman cemiyetleri toplaşıp, esas Ukrainada Qırım Muhtar Cumhuriyeti musulmanlarınıñ diniy idaresini qurmağa qarar aldı. Müfti olaraq Ayder Rustemov saylandı.
2017 senesi oktâbr ayında Ukraina medeniyet nazirliginiñ millet ve din departamenti Rustemov yolbaşçılığında Qırım Muhtar Cumhuriyeti musulmanlarınıñ diniy idaresini qayd etti.
