Qırımtatar cemaatı Eski Qırım şeeriniñ sakini Zarema Kulametovağa şeer parkında cemiyet işlerini yapmağa yardım ete. Rusiye mahkemesi qadınnı «akimiyet vekilini aqaretlegeninde» qabaatlap, oña qarşı cinaiy iş açqan edi.
«Qırım birdemligi» cemaat birleşmesiniñ saifesinde video derc etildi.
«Er kün Qırımnıñ farqlı köşelerinde yaşağan lâqayt olmağan insanlar oña qoltutmağa ve birdemlik köstermege kele, oña berilgen memuriy cezanı paylaşalar. Bu savap işte iştirak etken halqımız semetdeşleriniñ acısını ne qadar yahşı is etkenini, olarnıñ yanında olmağa, yardım qolunı uzatmağa bilgenini daa bir kere köstere. İnsaliyetlilik budır», – dep aytıla videodaki yazıda.
Kreml nezaretindeki İslâm-Terek rayonınıñ mahkemesi Zekkiy Kulametovnıñ ömür arqadaşı Zarema ve qızları Riananı yasaqlanğan timsallerni içtimaiy ağlarda paylaşqanında qabaatlap, 1000 ruble (tahminen 410 grıvnâ) para cezalarını tayin etti.
Sentâbrniñ 4-nde saba Eski Qırımda Kulametovlarnıñ evinde tintüv keçirildi. Soñra aileniñ üç azası politsiyağa alındı.
Rusiye uquq qoruyıcıları bunı öyle de izaatlamadı.
2018 senesi fevral ayında Zarema Kulametova politsiya hadimini «aqaretlegeni» içün politsiyağa çağırılğan edi.
Qabaatlağan tarafnıñ versiyasına köre, Kulametova, onıñ oğlu Giray Kulametov tutulıp alınayatqan künü politsiya hadimini aqaretlegeni içün sağlığına zarar bergen ve ayatiy telükege soqqan eken. Tahqiqat versiyasına köre, qabaatlanğan qadınnıñ aqaretlevinden Rusiyeniñ İslâm-Terek (Kirovskoye) rayonı İİN bölügi politsiya yolbaşçısınıñ muavini Andrey Rogojin zarar körgen.
2018 senesi aprel ayında İslâm-Terek (Kirovskoye) rayon mahkemesi Kulametova, politsiya hadimini aqaretlevde (Rusiye Cinayet kodeksiniñ 319-ncı maddesi) qabaatlı dep tanıdı. Qadın 250 saat mecburiy cemiyet işlerinde çalışuv ve zarar körgen politsiya hadimine tazminat olaraq 20 biñ ruble (8,3 biñ ğrıvnâ) ödevge mahküm etildi.
Zarema Kulametova özüni qabaatlı dep tanımay, onıñ imayecisi mahkeme qararına şikâyet berse de, bir netice alamadı.
Rusiye Qırımnı ilhaq etken soñ mustaqil jurnalistler, cemaat ve qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ile alâqaları olğanında şeklengen musulmanlarnıñ evlerinde sıq-sıq tintüvler keçirip başladı.
