Qırımnıñ bir qaç rayonı sentâbrniñ 25-nde yaramay ava sebebinden ışıqsız qaldı, dep bildire «Krımenergonıñ» matbuat hızmeti.
Energetiklerniñ malümatına köre, Aqmeçit rayonınıñ Çegelek (Kuznetskoye) ve Yaşpek (Vnukovo) köylerinde beş saat ışıq yoq edi. Bağçasaray rayonınıñ Çotqara (Krasnozorye) ve Gölümbey (Nekrasovo) köylerinde dört buçuq saat elektrikler yoq edi; İslâm-Terek sakinleri de eki saat elektriksiz oturdı.
Bundan ğayrı, Aqmescitte ve Sudaq civarındaki Qapsihor (Morskoye) ve Şelen (Gromovka) köylerinde de ışıqlar söndürilgen edi.
«Krımenergo» malümatına köre, üyle vaqtında Yedi Quyu rayonınıñ Yedi Quyu (Lenino) ve Körpe (Kalinovka) köylerinde de elektrikler kesildi. Saat 16:00 zarar körgen yerler daa qayd etile.
Daa evel bildirilgeni kibi, salı künü, sentâbrniñ 25-nde, Qırımda avalar bozulacaq edi. Küçlü yağmur yağması beklenile, sentâbrniñ 26-27-nde gece ve saba ise yarımadanıñ şimaliy ve dağ rayonlarında ayaz beklenile.
Rusiye Fevqulâde vaziyetler hızmetiniñ idaresi hatırlattı ki, yağmurlar yağğanda şeerde yürmekten vazgeçip, yeraltı keçitlerge kirmemege tavsiye etile. Bundan ğayrı, hızmet reklama tahtalarından, terek ve levhalardan uzaq turmağa çağıra.
