Zararlı himiyaviy maddelerniñ taşlanmasına oğrağan Ermeni Bazar (Armânsk) şeeriniñ sakinleri,mustaqil tibbiy ameliyathanelerniñ işini teşkil etmek, balalar bulunğan sanatoriylerde tolusınen oquv esnasını becermek, tibbiy hızmetlerni qısmen tölemek ve ketirilgen zararnı ivaz etmek Kreml nezareti altındaki şeer memuriyetine rica ete.
Qırım.Aqiqat Radiosınıñ efirinde Ermeni Bazar faalcisi Mariya Smirnova aytqanına köre, bu muracaat bir kün evel qayd olunğan edi.
“Tünevin biz öz muracaatımıznı qayd ettik, Konstantinov (Qırım akimiyetiniñ rusiye reisi- QA) keldi, ştab oturışuv keçirdi. Ekimlerge işanmaymız demeyik, amma şeerimiz küçük, mütehassıslarnen çoqtan berli problemalar bar edi. Olarnıñ 50%-dan ziyade - pensionerler, yaş ekimler deyerli qoşulmay. Tibbiy baquvlarnıñ çoqusı Ermeni Bazarda keçirilmey - tek esas soyları, qalğan hastalarnı ise Canköy ve Aqmescitke (Simferopol) yollaylar”, - aytıp berdi Smirnova.
Bundan ğayrı, yerli sakinler tibbiy hızmetlerniñ fiyetını qısmen tölemege ve ketirilgen zararnı ivaz etmege rica ete.
“Hastahanemizge, şeerimizge yardım etmek içün, adamlarnıñ analizlerini alacaq bir de bir ekimler taqımını ya da avuşıcı hızmetniñ ücretini tölemek yahşı olur edi. Ağır allı insanlar bar, sürekli hastalıqlar kerginleşe, ve er adam ücretli ameliyathanege barıp, bir qaç biñ ruble analizlerge berip olamay. Ketirilgen ziyannıñ ivaz etilmesi - bu şübesiz yapmaq kerek olğan bir arekettir, çünki çoq şeyge zarar tiydi: maşnalar, aletler, çaypalğan evler”, - dep qayd etti faalci qadın.
Rusiye matbuatlarına köre, Ermeni Bazarnıñ sakinleri şeer memuriyetine muracaatına eki yüzge qadar imza topladı. Hususan, yerliler mustaqil tibbiy ameliyathanelerniñ işini teşkil etmek, balalar bulunğan sanatoriylerde tolusınen oquv esnasını becermege talap eteler. Vesiqada, sakinler müim sayğan, episi olıp, yedi teklif bar.
Avgustnıñ 23-nden 24-ne keçer gecesi Ermeni Bazarda zararlı himiyeviy taşlantı atılğanı qayd etildi. Qırım memuriyeti, zararlı maddeler avağa atıluv sebebi - sıcaqtan ve uzun müddet yağış olmağanıdan, “Qırım titanı” qullanğan ekşilik havzularından çıqqan buvlanuvı dep iddia ete.
Faqat Kyiv, Qırımda himiyeviy taşlantılarnıñ avağa atılmasına Rusiye arbiyleri sebepçi olğan dep iddia ete, çünki olar idman yapqanda titan ve soda zavodlarınıñ taşlantılarına ateş açqan emiş.
Qırım şimalinde zararlı taşlantılar aqqanda daa çoq malümat Qırım.Aqiqat saytında tapa bilesiñiz.
Qırımnıñ rusiyeli başlığı Sergey Aksönov, Ermeni Bazardan (Armânsk) mektep çağına yetmegen ve mektep çağındaki balalarnı avanıñ bulaşuvı içün Qırım sanatoriylarına yollacaqları aqqında haber etti.
“Qırım titanı” zavodı daa 1971 senesi işinibaşladı, 2000 senelerniñ başında ise, Dmıtro Firtaşnıñ Groop DF şirketiniñ nezareti altına keçti. İşhaneniñ esas yönelişi - titan dioksidiniñ istisalı. Titan dioksidi - lak, boya, rezina, plastmassa işlep çıqaruvında ve daa çoq başqa saalarda qullanılğan madde.
"Qırımnıñ vatandaşlıq qamaçavı" aktsiyasınıñ iştirakçileri qıtaiy Ukrainadan "Ukrainian Chemical Products" şirketine qadar olğan demir yolunı blok ettiler. Qırımnın rusiyeli başı Sergey Aksönov degeni kibi, işbu şirketniñ yedegi daa bir ayğa yeter.
2014 senesi, Qırım işğalinden soñ, Dmitriy Firtaş, zavod idare etilmesiniñ terkibini deñiştirdi. Oktâbr ayında Groop DF, “Qırım titanı” şahsiy aktsiyalı şirketini (ŞAŞ) “Titan yatırımları” açıq aktsiyalı şirketine (AAŞ) berdi. 2015 senesi “Qırım titanı” ŞAŞı “Ukrainian Chemical Products” adını deñiştirdi.
