Ukrainadaki ABD elçihanesi Rusiyeden qırımlılarnı ailelerine qaytarmasını ve insan qaçırma, qıynamalarnı toqtatmasını talap ete. Bu aqta elçihaneniñ Twitter saifesinde aytıla.
«Qırımda ğayıp olğanlar: Dünya Qırımtatar kongressi icra komiteti ve regional Meclis azası Ervin İbragimovnıñ maşinasını yol hızmeti urbasında insanlar qaçırdı. O, qaçmağa tırıştı, amma mikroavtobusqa atıldı. Qırımlılar, hususan Ervinniñ ğayıp olmasından qasevetlenemiz», – dep aytıla beyanatta.
2016 senesi mayısta Bağçasarayda kimligi belli olmağan insanlar Dünya qırımtatar kongressi icra komitetiniñ azası Ervin İbragimovnı qaçırğan edi. Video nezareti kamerası Rusiye yol hızmeti urbasında eki insan İbragimovnıñ maşinasını toqtatıp, onı öz mikroavtobuslarına mindirgenlerini çıqardı. Qırım aq qorçalayıcı gruppası, Ervin İbragimovnı Rusiye akimiyeti ya da olarnıñ kontrolinde olğan taqımlar qaçırdı, dep tahmin ete.
Rusiye Taqiqat komitetiniñ Qırım idaresi qaçıruv aqqında cinaiy iş açqan edi. Faqat bugünge qadar Ervinniñ bulunğan yeri aqqında bir malümat yoq.
