Qaçırılğan qırımtatar faali Ervin İbragimovnıñ babası Ümer İbragimov Varşavada OSCE insan aqları konferentsiyasınıñ umumiy toplaşuvında çıqışta bulundı, dep haber ete Radio Svobodanıñ rus hızmeti mühbiri Anton Naumlük.
Ümer İbragimov oğlu Rusiye devlet organları tarafından qaçırılğanından emin olğanını bildirdi. Onıñ fikirince, bunıñ sebebi Ervinniñ faal olması ve qırımtatar halqınıñ aqları oğrunda küreşi oldı.
«Bir yıldan ziyade men ve advokatım Qırımdaki uquq qoruyıcı organları tarafından keçirilgen taqiqat malümatlarını körmege tırışamız, amma mahkeme izin bermey», – dep bildirdi faalniñ babası.
İbragimovnıñ aytqanına köre, qaçırılmazdan evel oğlu FSB hadimleri tarafından qorqutılğanını, taqip etilgenini bildirip, bir kere qaçırmaq tırışqanlarını haber etken edi.
«Rusiye eyyetine muracaat etem, halqara şartlarğa uyıp, sizden mında olğan er keske oğlumnıñ bulunğan yerini ve 2016 senesi mayısnıñ 24-den 25-ne keçer gecesi ne olğanını bildirmeñizni isteyim. Diger ürmetli eyyetlerge de muracaat etem, oğluma ne olğanını bilip, tapılmasına yardım etiñiz. Eki yıldan meni raatsızlağan şey budır», – dep sözüni bitirdi Ümer İbragimov.
İbragimovnıñ qaçırılması aqqında ABD Ukraina elçihanesi beyanat aydınlattı. Diplomatlar Rusiyeni «siyasiy baqışları farqlı olğan qırımlılarnı ailelerine qaytarmasına ve insan qaçırmı, qıynama areketlerini toqtatmasına» çağırğan edi.
2016 senesi mayısta Bağçasarayda kimligi belli olmağan insanlar Dünya qırımtatar kongressi icra komitetiniñ azası Ervin İbragimovnı qaçırğan edi. Video nezareti kamerası Rusiye yol hızmeti urbasında eki insan İbragimovnıñ maşinasını toqtatıp, onı öz mikroavtobuslarına mindirgenlerini çıqardı.
Qırım aq qorçalayıcı gruppası, Ervin İbragimovnı Rusiye akimiyeti ya da olarnıñ kontrolinde olğan taqımlar qaçırdı, dep tahmin ete.
Rusiye Taqiqat komitetiniñ Qırım idaresi qaçıruv aqqında cinaiy iş açqan edi. Faqat bugünge qadar Ervinniñ bulunğan yeri aqqında bir malümat yoq.
