«Qırım birdemligi» cemaat birleşmesiniñ faali Osman Belâlovnıñ tutulması teşkilâttaki faaliyetinen bağlı, dep tüşüne advokat Ayder Azamatov. Bunı o, sentâbrniñ 14-nde Qırım.Aqiqatqa bildirdi.
«Osman – siyasiy mabüslerniñ qorantalarına yardım etken, diger faallerniñ para cezalarını ödegen, mahkemelerge qatnağan bir faaldir. Elbette, oña apansızdan kelmediler. Tünevinki tintüv, bugünki memuriy iş, «Birdemlikniñ» işinen bağlı sualler, Marlen Mustafayevnen olğan alâqalar – biri-birinen bağlı olğan şeyler, bunı birleştirmege tırışalar», – dep qayd etti Azamatov.
Advokatnıñ aytqanına köre, mahkeme qararında olğan bütün videolardan tek bir danesi Belâlovnıñ içtimaiy ağdaki saifesinde mevcuttır.
«Neticede ceza bir – umumen 5 kün, sentâbrniñ 19-nda saat 11:20-de bite. Qayd etmeli ki, qararda qayd etilgen videolardan tek bir danesi saifesinde bar. 8 yıl devamında bu video tek 11 kere baqıldı. Belâlov mahkemede aqlında olsa edi, çoqtan silip taşlar edi, dep ayttı, amma mahkeme buña emiyet bermedi», – dedi Azamatov.
Belâlov Aqmescitteki mahsus izolâtorında tutulacaq, çünki Bağçasaraydaki vaqtınca tutuv izolâtorında boş yer qalmadı.
Kreml kontrol etken Bağçasaray şeer mahkemesi «Qırım birdemliginiñ» faali Osman Belâlovğa memuriy ceza berip, onı 5 künge nezaret altına aldı. Belâlov «yasaqlanğan teşkilâtnıñ timsallerini numayış etmesinde ve ekstremist malümatlarını kütleviy tarqatmasında» qabaatlandı.
Tünevin Rusiye uquq qoruyıcıları «Qırım birdemligi» cemaat teşkilâtınıñ faali Osman Belâlovnıñ evinde tintüv ötkerdi. O, evde degil edi. Aqmescitke ketti, amma baralmadı. Faalniñ tuvğanları bulunğan yerini bilmey edi. Soñra olarnen bağlanıp oldı.
Tintüvden soñ Belâlovlarnıñ babası tutuldı ve soñra çıqarılıp yiberildi.
Ukraina Tış işler nazirligi «Qırım birdemligi» faaliniñ evinde ötkerilgen tintüvni takbih etti.
2016 senesi Qırımnıñ rus mahkemesi Osman Belâlovqa 10 biñ ruble para cezasını tayin etken edi. O, 2016 senesi mayısnıñ 12-nde Bağçasaraydaki «Salaçıq» kafesi yanında «ruhsetsiz mitingte» iştirak etüvde qabaatlanğan edi. O künü faaller Rusiye telükesizlik hadimleri qırımtatarlarda tintüv yapqanını eşitip, kafe yanında toplaşqan ediler.
