Teatrniñ müdiri ve bediy reberi Bilâl Bilâlov işten boşatılğanı sebebinden narazılıq köstermek maqsadınen Qırımtatar muzıkalı-dramatik teatriniñ 16 aytuvlı artisti işten boşadı.
Bu aqta sentâbrniñ 6-nda Qırım.Aqiqatqa Bilâlovnıñ özü ikâye etip berdi.
“Mennen beraber 16 artistişten ketti. Olarnıñ arasında 9-zu: altısı Ukrainada, üçü Qırımda nam qazanğan artistlerdir. Bu insanlar ariza yazaraq işni bıraqıp kettiler. Ekseriyetini qalsınlar dep vazgeçirmege areket ettim. Çoqusınıñ bala-çağası, aileleri bar. Al-azırda 21 kişi işten boşadı (diger çalışqanlarnen beraber –QA)”, - dep ayttı Bilâlov.
Onıñ sözlerine köre, sentâbrniñ 6-na keçirilmege qararlaştırılğan sezon açılışına “studentler toplanıp ketirilir”.
“Bu menim programmalrım. Olar toplanıp zorbalıqnen anda studentlerni aydap ketirecekler. Qaç kişi toplap olacaqlarını bilmeyim. Olar menim eski programmalarımnı alıp deñiştireler. Özleri bir şey icat etip olamaylâr”, – dep ilâve etti o.
Material derc etilgen maalde teatrniñ yañı reberleri iç bir izaat bermedi.
Avgustnıñ 7-nde Qırımtatar muzıkalı-dramatik teatriniñ bediy reberi, Ukraina nam qazanğan sanat erbabı Bilâl Bilâlov işten boşatıldı. Rejissör uydurıq bir sebeplerden dolayı işten boşatıldı dep saya.
Rejissör işten boşatılğanı içün mahkemege muracaat etecegini haber etken edi. Teatr taqımı yolbaşçısına bütünley qol tuttı. Oña qol tutqanı aqqında Qırımtatar Milliy Meclisiniñ reisi Refat Çubarov da aytqan edi.
Bilâlov Qırımtatar muzıkalı-dramatik teatrinde 1989 senesi çalışıp başlay, 1994 senesinden itibaren onıñ bediy reberi-mudiri ola.
