Kefeniñ (Feodosiya) baş mimarı Sergey Polâkov istifa etti. Bunı şeerniñ rus akimiyetiniñ matbuat hızmeti haber ete.
“İşten çıqqanınıñ sebebi - aile meseleleri sebebinden qıtağa köçmesi. Sergey Aleksanroviç çoqtan berli köçmege azırlana edi, amma şeerniñ general planı boyunca esas işni bitirip, onı qabul etmekke azırladı ve namus ve mesuliyetlik ile soñki halq ögünde yapılğan diñlevgece çalışıp bitirdi”, - dep aytıla matbuat hızmetinde.
Bundan ğayrı, Polâkov Kefe şeer memuriyeti başınıñ muavini vazifesini becere edi.
2017 senesi avgust 31-inde Aqmescitniñ (Simferopol) baş mimarı İrina İvanova istifa etti.
2016 senesi noyabr ayında Kreml nezareti altındaki Qırım başlığı Sergey Aksönov Aqmescitniñ baş mimarı Ernst Mavlütovnı istifağa çıqardı. Martnıñ başında ise, mahkeme qararına esaslanaraq o vazifesi qaytardı ve işke çıqtı. Amma tamam şu künü devamında Mavlütov öz ihtiyarınen çalışqan vazifesinden ketmek içün ariza yazdı.
