Qırımnıñ rusiyeli ükümetiniñ başı Sergey Aksönov Kyiv okrug memuriy mahkemesine oña qarşı kirsetilgen sanktsiyalarnı lâğu etmege talap etken dava açtı. Bu aqta avgustnıñ 31-nde mahkemeniñ matbuat hızmeti haber etmekte.
“Davacı mahkemeden Milliy havfsızlıq ve mudafaa Şurasınıñ (SNBO) “Şahsiy iqtisadiy ve başqa sıñırlav tedbirlerini (sanktsiyaları) qullanuv ve lâğu etüv aqqında” qabul etken qararından Sergey Aksönovnıñ işbu cedvelden silinüvi vekirsetilgen sanktsiyalarınıñ qanunsız dep tanılmasını rica ete”, – denilmekte haberde.
MEVZUĞA DAİR:
Mahkemeden qurtulıp olamazsıñ
Mahkeme matbuat hızmeti qayd etkenine köre, SNBOdan ğayrı, davanıñ üçünci tarafı olaraq Ukraina prezidenti Petro Poroşenko, Ukraina Nazirler Şurası, SBU ve Ukraina Milliy bankası körüne.
Al-azırda munasip dava açmaq meselesi muzakere etilmekte.
Aksönov şimdilik mahkeme yolunen şahsiy sanktsiyalarnıñ lâğu ettirüv teşebbüsi aqqında açıq izaat bermedi.
Qırım Muhtar Cumhuriyetiniñ prokuraturası Qırım MC Yuqarı Şurasınıñ spikeri Vladimir Konstantinov ve yerli parlamentniñ sabıqdeputatı Sergey Aksönovqa nisbeten davanı baqmağa devam ete. Olar Ukraina Cinayet kodeksiniñ 109 ve 110 maddelerine binaen – “zorbalıqnen konstitutsion qurumnı avdaruv çağıruvlarında” ve “Ukraina topraq bütünligine qast etüvde” qabaatlana.
Ukraina prezidentiniñ saytında derc etilgen vesiqalarğa istinaden №467/2016 sanlı qararnıñ ilâvesinde, sanktsion cedvelge Qırım ükümetiniñ başı Sergey Aksönov, Qırım parlamentiniñ başıVladimir Konstantinov, Qırım parlamenti başınıñ sabıq muavini Remzi İlyasov, Qırım Nazirler Şurası reisiniñ sabıq muavini Ruslan Balbek, Aqyarnıñ sabıq gubernatorı Sergey Menyaylo ve al-azırdaki soyu – Dmitriy Ovsyannikov kirsetildi.
Umumen Qırım ilhaqı ve Donbasstaki çatışma sebebinden ukrain sanktsion cedveline Ukraina, Rusiye ve bir qaç diger devlet vatandaşları olğan 682 şahıs kirsetildi.
