Ağustos 21 salı künü bütün dünya musulmanları eñ büyük bayramları olğan Qurban Bayramını keçirip başladılar. Qırımtatarlar onı Qırımda ve Ukrainanıñ qıtadaki qısmında keçireler. İlhaq etilgen yarımadada qoşumça raatlıq künü ilân etildi.
Bildirilgenine köre, Aqmescitte, Keriçte, Aqyarda ve yarımadanıñ diger şeerlerinde bayram tedbirleriniñ ötkerilmesi planlaştırılğan.
Qurban Bayramı büyük meydanlarda cemaat ile qılınğan saba namazından başlana ve ondan soñ er yerde ayvanlarnı soyıp başlaylar. Bu ananeniñ tamırları, alemlerniñ Rabbisi İbraim peyğamberge oğlu İsmailni qurban etip çalmağa bermeyip ve sonki daqqasında qoynı kesmege buyurıp toqtatqanı aqqında qadimiy bir ikâyege barıp yeteler.
Keçken sene Aqmescitte Qurban Bayramı kününde türlü mevzular boyunca teşkil etilgen ustalıq sınıfları ve qırımtatar kollektivleriniñ çıqışları olıp keçti. Keriçte şeerniñ deñiz yalısındaki meydanında sakinlerni bedava pilâv ile sıyladılar. Kyivde Qurban Bayramını «Ar-Rahma» camisinde keçirdiler.
Qurban Bayramı musulmanlarnıñ eñ büyük bayramlarından biri olaraq, Mekkege acılıqnıñ soñuna yetmesini temsil etip, Oraza Bayramından 70 kün keçken soñ İbraim peyğamberniñ qurbanı hatırasına keçirile.
