«Veciye Kaşka işi» boyunca qabaatlanğan qırımtatar faaliyetçisi Asan Çapuhta arterial damar basımı yükseldi. Bu münasebetnen o, Kremlniñ kontroli altında olğan Qırım Yuqarı mahkemesiniñ oturışuvında iştirak etip olamadı.
Qırım.Aqiqat muhbiriniñ ağustos 21-de bildirgenine köre, advokat Aleksandr Lesovoy bu aqta mahkeme zalında ikâye etti.
Lesovoy: «Oturışuv başlamadan evel Çapuh maña arterial basımınıñ 180/110-ğace atlağanını ve bu al ile mahkeme oturışuvında iştirak etemeycegini bildirdi. Bular köz ögüne alınıp, (mahkemede – QA) feldşerniñ bulunması istenilmektedir. Aks-alda imaye oturışuvnıñ başqa künge avuştırılmasını rica ete», – dedi.
Qırım.Aqiqat muhbiriniñ malümatına köre, mahkeme, aqsız yerde para talap etüv aqqında iş boyunca oturışuvnı ağustos 23 künü saat 14:00-ke avuştırdı.
Bildirilgenine köre, figurant Bekir Degermenciniñ qorçalayıcısı mahkemede musulmanlarnıñ Qurban Bayramı münasebetinen oturışuvnıñ başqa künge avuştırılması aqqında muracaat etti.
Ondan ğayrı, işniñ figurantları oturışuvda videokonferentsiya vastasınen iştirak etmelerine qarşı çıqıp, mahkemege ketirilmelerine dair muracaat ettiler. Tahqiqat izolâtorı ile alâqa añlaşılması zor şeklinde edi. «İşniñ» figurantlarından biri, Ruslan Trubaç, aks-alda bundan soñ mahkeme davasında iştirak etmeycegini bildirdi. Akem muracaatnı red etti.
Bekir Degermenciniñ ömür arqadaşı Aliye: «Ne içündir bilmem, bütün mahkeme oturışuvları ya bayram kününe, ya da cumağa, cuma namazı vaqtına tayin etileler. Akemler buña asla emiyet bermeyler. Bara-bara tamam bugün, muqaddes bayram kününde insanlarnıñ öz evlerinde musafirlerni qabul etmek yerine mahkemege barmaq zorunda qalması aqaylarımıznıñ zıtına pek tiydi», – dedi.
2017 senesi noyabr 23-te Aqmescitte Rusiye telükesizlik hadimleri bir gruppa qırımtatarlar – Kâzim Ametov, Asan Çapuh, Ruslan Trubaç ve Bekir Degermencini yaqaladılar.
Olarnı, Türkiye vatandaşından aqsız yerde para talap ettiler, dep şübheli tanıdılar. Yaqalanuvları esnasında qırımtatar milliy areketiniñ veteranı Veciye Kaşka yaramadı. Daa soñra qadın vefat etti.
Bundan evel, bu işniñ figurantlarında sağlıq ile ciddiy problemalar olğanı bildirilgen edi. Bekir Degermencide sürekli astma bar. Çapuh tahqiqat izolâtorında mikroinsult keçirdi.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
