Ukrainada qayd etilgen Donetsk, Lugansk vilâyetlerinden ve Qırım MC-nden kelgen iç icretçilerniñ (memleket içinde yerinden köçkenler) sayısı ep artmaqta. Bunı İçtimaiy siyaset Nazirliginiñ saytındaki malümat köstere.
Ealiniñ içtimaiy qoruvı terkibiy bölükleriniñ malümatına esaslanaraq, müessise, işğal altındaki Donetsk, Lugansk vilâyetleri ve Qırım MC topraqlarından 1 516 237 köçip kelgenler esapqa alınğanını haber ete.
2017 senesi oktâbrniñ 23-üne İçtimaiy siyaset Nazirligi, Ukrainada 1 604 059 iç icretçileri qayd etilgenini haber etken edi. Bir aydan soñ ise – 1 494 806, amma raqamlardaki farqnıñ sebebini iç añlatmadılar. Ondan soñra, Nazirlikniñ malümatına köre, iç icretçilerniñ sayısı er ay çoqlaşa.
Halqara cemaatçılıq Qırımnıñ işğali ve ilhaqını qanunsız dep tanıdı ve Rusiyeniñ areketlerini tenqit etti. Ğarp memleketleri bir sıra iqtisadiy sanktsiyalar kirsetti. Rusiye yarımada ilhaqını inkâr etip, buña «tarihiy adaletniñ tiklenmesi» dey. Ukraina Yuqarı Radası 2014 senesi fevral ayınıñ 20-sini Rusiye tarafından Qırımnıñ muvaqqat işğaliniñ resmiy başlanğıç künü dep qabul etti.
