Mail.ru Group rusiye şirketi (“VKontakte” içtimaiy ağnıñ saibi) layk ve repostlar içün “adaletsiz mahküm etilgenler”ni amnistiya yapmaq ve ileride bu areketler içün qabaatlavlarğa yol bermemege çağırttı. Bunıñ aqqında şirketniñ press-relizinde aytıla.
Şirket qayd ete ki, Rusiyeniñ çoqusı bölgesinde içtimaiy ağlarda layk ve repost içün qullanıcılarğa cinayet işleriniñ açılması adet olıp tarqaldı.
“Çoqusı alda küç organları hadimleriniñ areketleri ola bilgen telükege uymay. Tefsirlerdeki yazılar ve memlerge ise qararından ziyade qarşılıq kösterile”, - dep aytıla arizada.
Mail.ru Group şirketinde eminler ki, Rusiye qanunları ve qanun qullanuv ameliyatı deñiştirilmek kerek.
2018 senesi iyünniñ soñunda Rusiye Devlet dumasında internette repost içün cinaiy mesüliyetini lâğu etmek teklifinen qanun leyhası kirsetildi. Onıñ müellifleri aytqanına köre, yazılar ve haber repostları “içtimaiy telükesi seviyesine köre zararsızdır” ve, bunıñ içün, cinayet olaraq sayıla bilmez.
2017 senesi Rusiyede CK-niñ (6 yılğa qadar apis cezasına izin bergen) 282-nci maddesine köre içtimaiy ağlarda layk ve repostlar içün 461 adam cezaiy mesüliyetke çekildi. İyünniñ 7-sinde “doğrudan hat” devamında rusiye prezidenti Vladimir Putin böyle areketler içün cezalamanı “absurd ve marazm derecesine yetkizmemek” kerek olğanına razı oldı.
