Rusiyede SİZOda bulunğan qırımlı Emir-Üsein Kuku iyülniñ 19-ına açlığını toqtattı. O, bütün ukrain mabüsleriniñ azat etilmesi talabınen, narazlığını 24 kün evel başlağan edi. Bu aqta Radio Svobodanıñ muhbiri Anton Naumlük Qırım.Aqqiqatqa haber etti.
O bergen malümatqa köre, açlıqnı toqtatmağa Kukunı apayı Meryem Kuku qandırdı. Emir-Üsein açlıqtan vazgeçecegi aqqında ariza yazdı ve tedaviylenmekni başladı: ğıdalı qarışmalarnı aşay ve tibbiy yardımnı qabul ete.
Evelleri advokat Edem Semedlâyev, mabüske vatandaşlarınınıñ açlıqnı toqtatmaq ricalarını bildirgenini, haber etken edi.
İyülniñ 10-una Emir-Üsein Kuku Rusiyedeki Rostov-na-Donu şeeriniñ SİZOsından belli olmağan yerge yollanılğan edi. Onıñ ne yerde bulunğanı aqqında advokatına haber bermekni red ettiler. Keççe belli oldı ki, Kukunı tibbiyet müessisesinde baqınuvdan keçirdiler.
Mayısnıñ soñunda Şimaliy Kavkaz bölgesiniñ arbiy mahkemesi Yaltalı «Hizb ut-Tahrir işi»niñ 6 iştirakçisine tevqifnı 3 ayğa uzattı.
Bu iş boyunca qabaatlanğan Arsen Cepparov, Refat Alimov, Emir-Üsein Kuku, Muslim Aliyev, İnver Bekirov ve Vadim Siruk 2016 senesiniñ fevral-aprel aylarında Yaltada tutlğan ediler. Olar Rusiyede yasaq etilgen «Hizb ut-Tahrir» siyasiy İslâm teşkilâtına alâqadar olğanlarında qabaatlana.
Rusiye arbiy mahkemesi Yaltalı «Hizb ut-Tahrir işi»ni Aqmescitte ötkerilgen köçüci oturışuvlarında baqa edi. Ondan soñ tevqif etilgen Qırım sakinleri Rostov-na-Donu şeerine yollandı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
