Aqmescit psihiatriya hastahanesiniñ ekimleri Qırım blogeri, vatandaş faaliyetçisi Nariman Memedeminovnıñ psihiatriya ekspertizasına yollanılğanına taacipleneler. Bunı, iyül 4-te Memedeminovnı ziyaret etken advokat Edem Semedlâyev ikâye etti.
Advokat: «Narimannıñ ruhiy alı normal, küreşçı alıdır. O, qabaatı olmağanını, psihiatriya ceetinden normal olğanını isbatlamağa azır. Bu vaziyet onı pek çekiştirse de, o, asılında bu ekspertizadan keçirilgenini doğru saymay. Psihiator ekimler amelde onıñnen er kün körüşe ve onıñ bu ekspertizağa ne sebepten yollanılğanına taacipleneler, çünki o, adekvat bir insandır», – dep ikâye etti.
Semedlâyev, tevqif etilgen blogerniñ ne ekimlerge, ne de onı hastahanede qaravullağan insanlarğa bir türlü itirazları yoq, dep qayd etti.
Semedlâyev: «Onda musulmanlar, qırımtatarlarnı terrorist sayğan ve «terrorist» olsa, demek insan normal degil ve onı psihiatriya eskpertizasından keçirmek kerek, degen Rusiye qanunlarına itirazları bar. Onıñ açuvını çıqarğan da, tamam bu. O, adekvat, normal insan olğanını isbatlamağa azır ve isbatlamaqtadır», – dep bildirdi.
Mayıs 15-te Rusiyeniñ kontroli altında olğan Aqmescitteki Kiyevskiy rayon mahkemesi, terrorizmniñ propagandasında qabaatlanğan qırımtatar faaliyetçisi, vatandaş jurnalisti Nariman Memedeminovğa tevqifni dört ayğa uzattı. Memedeminov tahqiqat izolâtorında ağustos 15-ke qadar qalacaq.
Martta Bağçasaray rayonında Rusiye telükesizlik ve polis hadimleri Nariman Memedeminovnıñ evini tinttiler. Bundan soñ mahkeme Memedeminovnı tevqif etti.
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaqaqqınıñ bozuluvı» dedi.
Ukraina TİNi vatandaş faaliyetçisiniñ yaqalanmasını taqbih etip, ilhaq etilgen Qırımdaki Rusiye ukümetinden Memedeminovnıñ azat etilemsini talap ete.
