Aqmescit klinik bala hastahanesinde çalışqan 11 ekim arasından qomşu Rusiyeden kelgen 10-nı işten boşatıldı. Boştıluv sebebi – olarnıñ kompetentsiz olğanı dep haber etti Rusiyeniñ «Sputnik v Krımu» radiosı efirinde hastahaneniñ baş ekimi Anatoliy Oleynik.
«2015 senesinden başlap menim hastahanemden başqa yerden kelgen 11 ekim kelip keçti, men ise 10-nı işten boşattım. Afsus ki, eger ekim – yahşı bir mutehassıs ise, o başqa bir regionğa çalışmağa ketmez. Tabir caiz ise, esasen dolandırıcılar kele. Tek bir ekim qaldı, o yahşı bir mutehassıs, o alıştı, onıñ ilerilemesi içün bunıñ faydası olğanını köremiz», – dep qayd etti baş ekim.
Oleynik al-azırda hastahaneniñ tar zenaat mutehassıslarına, hususan anesteziologlarğa ihtiyacı olğanı aqqında ayta.
Daa evel Qırım.Aqiqat Radiosı efirinde Aqyar ana ve bala sağlığını qorçalav Merkeziniñ sabıq baş LOR-ekimi Yuriy İskrenko, ilhaq etilgen Qırımda çalışqan «tez yardım» hususan professional mutehassıslarnıñ yetişmeyuvından zarar körgeni ve yañı hastahane qurulğanınen mesele çezilmeycegi aqqında aytqan edi.
Yarımadanıñ tibbiy muessiselerinde mutehassıslar yetişmey, Qırımnıñ 700 ekimge ihtiyacı bar. Bu malümatnı iyünniñ 17-nde Qırımnıñ rusiyeli sağlıq naziri Aleksandr Golenkomisal etip köstergen edi.
