Rusiye tarafından ilhaq etilgen Qırımda terrorizmniñ propagandası şübhesi ile tevqif etilgen bloger, vatandaş faaliyetçisi Nariman Memedeminovnı psihiatriya hastahanesine yerleştirdiler. Bunı, Qırım advokatı Emil Kurbedinovğa atıfta bulunıp, «Qırım birdemligi» cemiyet birleşmesi bildire.
Qorçalayıcınıñ malümatına köre, Memedeminovnı, eñ az 20 künge psihiatriya hastahanesine «teşkerüv» içün yerleştirdiler.
Bildirilgenine köre, advokat buña, «imayesi altına olğan şahısqa qarşı qaba surette aqlarnıñ bozuluvı ve onıñ printsipial noqtai-nazarına tazyiq», dep qıymet kese.
Rusiye telükesizlik strukturaları tarafından bu hususta açıq menbalarda berilgen izaatlar yoq.
Mayıs 15-te Rusiyeniñ kontroli altında olğan Aqmescitteki Kiyevskiy rayon mahkemesi, terrorizmniñ propagandasında qabaatlanğan qırımtatar faaliyetçisi, vatandaş jurnalisti Nariman Memedeminovğa tevqifni dört ayğa uzattı. Memedeminov tahqiqat izolâtorında ağustos 15-ke qadar qalacaq.
Martta Bağçasaray rayonında Rusiye telükesizlik ve polis hadimleri Nariman Memedeminovnıñ evini tinttiler. Bundan soñ mahkeme Memedeminovnı tevqif etti.
Mart 23-te QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaqaqqınıñ bozuluvı» dedi.
Ukraina TİNi vatandaş faaliyetçisiniñ yaqalanmasını taqbih etip, ilhaq etilgen Qırımdaki Rusiye ukümetinden Memedeminovnıñ azat etilemsini talap ete.
