İyün 28-de Bağçasarayda qırımtatar halqınıñ lideri Mustafa Cemlevniñ apayı Safinarnıñ aydavcısı Ahtem Mustafayevniñ evi tintilmekte. Bunı Facebooktaki saifesinde qırımtatar faaliyetçisi Zair Smedlâyev bildire.
Smedlâyev: «Bağçasaraynıñ 6-ncı mikrorayonı, Cafer Seydamet soq., 42-de tintüv. Safinar apte Cemilevanıñ aydavcısı Ahtem Mustafayevniñ evinde. Ahtem özü evde yoq, yalıñız anası bar. Tintüvniñ sebebi belli degil. Kamuflâjlı ve balaklavalı silâlı adamlar dört mikroavtobusnen keldi ve, qaravullar qoyıp, soqaqnı qapattılar», – dep qayd ete.
Ondan ğayrı, Smedlâyev, Ahtem Mustafayevniñ anası yaramadı, telükesizlik hadimleri yanına ekimlerni yibermeyler, dep bidlirdi.
Al-azırda Rusiye uquqqoruyıcıları ve Qırım ükümeti tarafından vaziyetke dair resmiy malümat berilmedi. Qırım.Aqiqat tafsilâtlarnı ögrene.
İlhaqtan soñ Qırımdaki faktik Rusiye akimiyeti mustaqil jurnalistler, vatandaş faaliyetçileri, Qırımtatar milliy areketiniñ faaliyetçileri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
