Türkiye yuqarı saylâv komissiyası al-azırdaki lider Recep Tayyip Erdoğannı prezident saylâvlarınıñ saltıq ğalibi dep ilân etti.
Komissiya reisi Sade Güven iyünnniñ 25-nde saba Erdoğan yaqın raqibini «reylerniñ saltıq ekseriyetinen» ozıp keçkeni aqqında ilân etti.
O, temelli malümat bermedi. Güvenniñ sözlerine köre, saylâvcı reyleriniñ artıq 97,7% sayılğan. O, sayılıp yetiştirilmegen reyler Erdoğannıñ ğayrıdan saylânmasına tesir etmeycegi aqqında ayttı.
Soñki neticelerni komissiya iyünniñ 25-nde daa keççe derc etmek kerek.
Daa evel devlet televizionı bülletenlerniñ 99% sayılğan soñ, Erdoğan reylerniñ 53% qazanğanını, böyleliknen birinci tur neticelerine istinaden prezident olğanı aqqında haber etken edi.
Onıñ esas raqibi, muhalif Cumhuriyet Halq Partisiniñ lideri Muharrem İnce reylerniñ 31% qazandı.
Erdoğan ğalip ilân etilgen soñ, terrorist teşkilâtlarğa qarşı qatiyen areket eterek, Suriyede daa ziyade topraq azat etecegini ve Suriyedeki vatandaşlar cenkinden dolayı qaçmağa mecbur qalğan biñlernen Türkiye «musafirine»evlerine raat qaytmağa imkân berecegi aqqında ayttı.
Bundestagnıñ alman-türk parlament gruppasınıñ reisi Sevim Dağdelen dpa agentligine, Türkiyede keçken saylâvlar «serbest ve kerçek olmağanı» aqqında ayttı.
«Erdoğan öz maqsadına yetti – saylâvlardan bayağı evel başlatılğan ayın-oyunlar yolunen elde etilgen avtoritar prezidentlik sisteması», – dedi o.
2017 senesi keçken referendumden soñ maqul tanılğan Anayasa deñişüvleri neticesinde, Türkiye parlament idaresinden prezident idaresine keçerek, nevbetteki prezidentke keniş imkânlar tanıy.
Erdoğannıñ 2019 senesinece devlet başında qalmağa fırsat bergen deñişmeler içün rey bergenlerniñ 51% qol tuttı. Olar saylâvlardan soñ küçke kirecek.
Erdoğan 2003-2014 seneleri arasında Türkiye baş naziri, ondan soñ prezidenti olğan edi.
