Qırımtatar halqınıñ lideri Mustafa Cemilevniñ ağası Asan Cemilev, ailesiniñ 1944 senesinde Qırımdan sürgün etilgenini ikâye ete. Mayıs 18 sabasında Cemilevler qorantası yaşağan evge sovet askerleri keldi. Evniñ içinde yalıñız beş balasınen anası bar edi. Olarğa, silâlar ile qorquzıp, eñ kerekli şeylerni toplamaq ve 15 daqqa içinde evni terk etmekni buyurdılar. Daa soñra bütün aile yük vagonında Özbekistanğa alıp ketildi. 1944 senesi mayıs 18-de qırımtatarlarnıñ Qırımdan zornen sürgün etilmesi başlandı. Eki kün içinde Qırımdan Orta Asiyağa 200 biñge yaqın kişi alıp ketildi. Resmiy malümatqa köre, qırımtatarlarnıñ çerigi, ğayrı-resmiy, halqnıñ özü yapqan eali tahririniñ malümatına köre ise – ealiniñ aman-aman yarısı sürgün etilgen soñ öldi. Ukrainada qırımtatar halqınıñ sürgün etilmesi genotsid olaraq tanıldı.
